Imajen/Media PN.

DILI, 10 maiu 2021 (TATOLI)—Reprezentante Povu sira iha uma fukun Parlamentu Nasionál, segunda ne’e altera ona projetu-lei kona-ba alterasaun Lei Migrasaun no Azilu iha finál globál.

Notísia Relevante: PN aprova projetu-lei migrasaun no azilu iha jeneralidade

Votasaun finál globál Projetu-lei númeru 25/V/ (3a kona-ba alterasaun dahuluk Lei númeru 11/2017, 24 maiu (Lei Migrasaun no Azilu). Projetu-rezolusaun ne’e alterada ho rezultadu votasaun a-favór 42, abstensaun 0 no kontra 3

“Projetu-lei  númeru 25/V/ (3a) aprovadu,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Prezidente Komisaun B ne’ebé trata asuntu Negósiu Estranjeiru, Defeza no Seguransa, Deputadu José Agustinho Siqueira ‘Somotxo’ esplika inisiativa ba projetu-lei ne’e mai hosi deputadu sira hosi komisaun refere.

“Primeira-alterasaun ba lei migrasaun no azilu no ho artigu ida de’it ho objetivu fó valór ba konkordata ne’ebé Governu Timor-Leste asina ho Santá Sé kona-ba vistu permanénsia. Tanba iha konkorda iha artigu 21 ne’ebé ko’alia kona-ba vistu ba tempu naruk maibé to’o ohin loron ita seidauk tau iha prátika kona-ba vistu tempu naruk ba misionáriu katólika estranjeiru sira,” Prezidente Komisaun B esplika.

Nia fundamenta, iha projetu-lei ne’e propoin altera artigu 13, 41, 59, no 127 hosi Lei númeru 11/2017, 24 maiu kona-ba Lei Migrasaun no Azilu.

Tanba durante ne’e misionáriu katólika sira sei tuir nafatin vistu normál ho tipu A ho vistu tinan rua (2) no tipu B ho vistu tinan lima (5) maibé misionáriu sira kumpre de’it vistu ba tinan rua (2) nian.

Nia fó-sai katak iha debate espesialidade ne’e deputadu sira aprova ona artigu 13, hela artigu 41, 59 no 127.

Purtantu tuir dokumentu ne’ebé Agência TATOLI asesu iha Parlamentu Nasionál, katak artigu 13 ne’e defende konkorda entre Timor-Leste ho Santa Sé, artigu 41 ko’alia kona-ba autorizasaun rezidénsia ba sidadaun estrangeiru iha fixasaun rezidénsia.

Nune’e mós artigu 59 foka kona-ba autorizasaun rezidénsia ho tipu temporária no permanente, no artigu 127 ko’alia kona-ba izensaun ba impostu no taxa alfandegária no tributária.

Entretantu projetu-lei alterasaun dahuluk ne’e aprovada iha faze jeneralidade iha loron 27 abríl 2021 ho rezultadu votasaun a-favór 48 no abstensaun 5.

Notísia Relevante: Alterasaun lei migrasaun-azilu fó tratamentu espesiál ba misionáriu Katólika estranjeiru

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here