Governu ho Parlamentu Nasional debate Orsamentu Retifikativu iha faze espesialidade, iha sala plenária PN, kuarta (21/04). Imajen Tatoli/Egas Cristovão.

DILI, 09 maiu 2021 (TATOLI)Reprezentante povu iha uma fukun Parlamentu Nasionál (PN), halo alterasaun dahuluk ba Lei Migrasaun no Azilu, ho objetivu atu fó tratamentu espesiál ba misionáriu estranjeiru-sira ne’ebé hala’o misaun relijioza iha Timor-Leste (TL).

Alterasaun dahuluk ba Lei númeru 11/2017,24 (Lei Migrasaun no Azilu), liuhosi projetu-lei númeru 25/V/ (3a) ne’e, bazeia ba konkordata entre Estadu Timor-Leste ho Estadu Santa Sé.

Notísia relevante:Igreja Katólika-MNEK Atualiza Prosesu Implementasaun Konkordata

Prezidente Komisaun B ne’ebé trata asuntu Negósiu Estranjeiru, Defeza no Seguransa, Deputadu José Agustinho Siqueira ‘Somotxo’, esplika inisiativa ba projetu-lei ne’e mai hosi deputadu-sira hosi komisaun ne’e.

“Primeira-alterasaun ba lei migrasaun no azilu ne’e, ho objetivu atu fó valór ba konkordata ne’ebé Governu Timor-Leste asina ho Santá Sé, kona-bá vistu permanénsia. Bainhira projetu-lei ne’e sai ba Lei fó tratamentu espesiál ba misionáriu Katólika estranjeiru, tanba durante ne’e sira-nia vistu ba tinan rua de’it, maibé lei ne’e fó ba longu prazu (renovasaun vistu ba tinan lima),” Prezidente Komisaun B, informa ba jornalista Agência Tatoli, domingu ne’e.

Deputadu ne’e dehan, iha asinatura konkordata entre Estadu RDTL ho Santa Sé, previstu iha artigu 21 katak, vistu ba misionáriu Katólika, tenke ba tempu naruk (tinan lima), ne’ebé ko’alia kona-bá vistu ba tempu naruk, maibé to’o ohin loron seidauk tau iha prátika kona-bá vistu tempu naruk.

Prezidente Komisaun B ne’e fó-sai katak, alterasaun ne’e fó de’it tratamentu espesiál vistu ba misionáriu Katólika estranjeiru ba tinan lima, maibé ba sidadaun bainbain vistu ba tinan rua de’it.

“Relijiaun-sira seluk, la’e. Maibé, depende ba sira. Bainhira sira hakarak benefisia, ida-ne’e tenke liuhosi konkordata. Katak, sira-nia relijiaun tenke halo akordu ho Estadu Timor-Leste,” Prezidente Komisaun B subliña.

Nia fundamenta, iha projetu-lei ne’e propoin atu halo alterasaun ba artigu 13, 41, 59, no 127 hosi Lei númeru 11/2017, 24 maiu kona-bá Lei Migrasaun no Azilu.

Tanba, durante ne’e misionáriu Katólika-sira sei tuir nafatin vistu normál ho tipu A, ho vistu tinan rua no tipu B ho vistu tinan lima, maibé misionáriu-sira kumpri de’it vistu ba tinan rua.

Tuir dokumentu ne’ebé Agência Tatoli asesu iha Parlamentu Nasionál, sentidu hosi alterasaun artigu 13 ne’e, atu fasilita obtensaun vistu entrada permisaun rezidénsia longu prazu ba misionáriu Katólika estranjeiru-sira no bazeia ba konkordata entre Timor-Leste ho Santa Sé.

Entretantu artigu 41 ko’alia kona-bá autorizasaun rezidénsia ba sidadaun estranjeiru iha fixasaun rezidénsia.

Artigu 59 foka kona-bá autorizasaun rezidénsia ho tipu temporária no permanente, no artigu 127 ko’alia kona-bá izensaun ba impostu no taxa alfandegária no tributária.

Projetu-lei alterasaun dahuluk ne’e, aprovada iha faze jeneralidade iha loron 27 abríl 2021, ho rezultadu votasaun a-favór 48 no abstensaun lima.

Tuir ajenda ne’ebé iha, aban lokraik, reprezentante povu sei halo votasaun finál globál ba projetu-lei ne’e.

Jornalista: Evaristo Soares Martins

Editór: Cipriano Colo

HAKEREK NO HATÁN

Please enter your comment!
Please enter your name here