Líder órgaun soberanu hosi Parlamentu Nasionál no Tribunál Rekursu no Governu simu vasina AstraZeneca doze daruak iIha serimónia lansamentu doze daruak, iha Centro Convenções Dili (CCD), kinta (10/06/21). Imajen Tatoli/Egas Cristóvão.

DILI, 10 juñu 2021 (TATOLI)—Governu liu hosi Minsitériu Saúde (MS), halo lansamentu ba vasina AstraZeneca doze daruak ne’ebé oferese hosi COVAX Facility, iha Centro Convenções Dili (CCD), kinta ne’e.

”Variante hosi COVID-19 iha mundu aumenta makaas, tanba ne’e vasina kontra COVID-19 importante tebes hodi bele kombate. Ita kontente tebes tanba horseik Timor-Leste simu tán doze 100.800 inklui doze 24.000 hosi mekanizmu Co-Sharing tanba kontribuisaun hosi Governu Nova Zelândia,” Ministra Saúde, Odete Maria Freitas Belo, hateten iha diskursu.

Notísia relevante:Ema 93.525 simu ona vasina AstraZeneca doze dahuluk

Ho esforsu no preparasaun makaas ne’ebé Komisaun Interministeriál ba vasina kontra COVID-19 halo, relasiona ho doasaun hosi COVAX Facility, finalmente  konsege lansa duni doze daruak.

To’o oras-ne’e totál sidadaun na’in 90.000 simu ona doze dahuluk vasina AstraZeneca no númeru ne’e MS konsegue atinji tanba doasaun hosi Governu Austrália ne’ebé suporta no komprometidu nafatin atu kontinua halo doasaun vasina ne’e, hodi asegura katak, populasaun tomak iha TL bele sai protejidu hosi moras COVID-19.

MS mós konsidera doasaun vasina AstraZeneca hosi COVAX Facility sei haforsa diak liu tán apoiu-sira seluk hosi Governu Austrália no Governu Xina, hodi kontribui nafatin ba esforsu ne’ebé Governu halo hodi luta hasoru pandemia COVID-19.

Durante fulan juñu no jullu 2021, Governu bele kompleta ona vasina ba 20% populasaun ne’ebé iha grupu prioritáriu, maibé, MS tenke asegura katak pelu menus tinan ida-ne’e konsegue atinje meta ne’ebé tama iha planu vasinasaun, hodi vasina totál populasaun adultu ka ho idade liu hosi tinan 18.

MS hakarak agradese espesiál ba ekipa téknika hosi Fundu Nasaun Unida ba Infânsia (UNICEF) no Organizasaun Mundiál Saúde (OMS) ne’ebé sempre halo esforsu hamutuk ho Ministériu Saúde rasik hodi asegura katak, vasina hosi COVAX bele mai lalais iha TL  no kompleta kobertura vasinasaun ba grupu prioritáriu no profisionál sira ne’ebé iha liña frente.

Odete Maria Freitas Belo esklarese ba ema hotu katak, sira ne’ebé simu ona doze dahuluk maibé hetan moras COVID-19, bele simu doze daruak hodi asegura efetividade vasina no preve kontájiu virus.

Iha serimónia lansamentu ba doze daruak ne’e, oferese mós ba membru Governu  ne’ebé simu ona doze dahuluk iha 07 abríl, tanba kompleta ona semana ualu.

Partisipa iha serimónia lansamentu ne’e, membru Governu, membru Parlamentu Nasionál, reprezentante Polísia Nasionál Timor-Leste (PNTL), parseiru dezenvolviemntu-sira, diplomata,  inklui profisionál saúde-sira.

Notísia relevante:AstraZeneca doze daruak 100.800 to’o ona TL

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here