Pesoál aviasaun hatuun hela vasina AstraZeneca doze daruak hosi COVAX Facility hamutuk doze 100.800, iha Aeroportu Comor, tersa (09/06/21). Imajen Tatoli/António Gonçalves.

DILI, 09 juñu 2021 (TATOLI)—Vasina AstraZeneca ba doze daruak hamutuk doze 100.800, ne’ebé oferese hosi COVAX Fasility, to’o ona Timor-Leste (TL), ho aviaun Asia airlines TRI-MG.

”Ita simu tan vasina AstraZeneca ba faze daruak, hosi COVAX facility atu haforsa liu-tán apoiu sira seluk hosi Governu Austrália hodi luta hasoru virus COVID-19,” Ministra Saúde, Odete Maria Freitas Belo hateten iha serimónia entrega, iha Aeroportu Comoro, kuarta ne’e.

Notísia relevante:Ema 93.525 simu ona vasina AstraZeneca doze dahuluk

Odete Maria Freitas Belo, agardese  ba ekipa tékniku hosi UNICEF no Organizasaun Mundiál Saúde (OMS), ne’ebé sempre halo esforsu hamutuk hodi asegura vasina hosi COVAX facility to’o TL.

Iha fatin hanesan, reprezentante UNICEF, Bilal Durrani, orgullu tebes atu dezempeña papel iha funu hasoru pandemia ne’e, no serbisu hamutuk ho Governu TL inklui parseiru dezenvolvimentu-sira seluk.

”Esperansa ida-tan maka ohin UNICEF oferese vasina úniku boot liu tama mai TL. Ne’e lori ita besik liu ba promesa COVAX facility atu fornese tan vasina rihun-atus lima resin, ne’ebe sei ajuda vasina populasaun 36% ho tinan 18 ba leten,” Bilal Durrani, hateten.

Armazén sufisiente asegura Astrazeneca-Sinovac

Diretór ezekutivu Serbisu Autónomu Medikamentu no Ekipamentu Saúde (SAMES), Santana Martins, hateten Armazén SAMES sufisiente atu asegura vasina  Astrazeneca no Sinovac.

”Armazén sufisiente hodi asegura vasina rua ne’e, importante mós ita esforsu atu hahú agora bele  distribui ba munisípiu Dili kontinua to’o aban,” Santana Martins, hateten.

SAMES mós laiha problema kona-bá eletrisidade tanba iha jeradór no iha fider rua ne’ebé instaladu hosi Eletrisidade Timor Leste (EDTL),  nune’e garante hodi organiza pesoál sira atu bele serbisu mós iha tempu kalan.

Oras ne’e daudaun SAMES iha karreta malirin ida ne’ebé sosa iha 2018 no daudaun-ne’e aluga hela kareta malirin rua atu bele kobre rejiaun rua.

Karreta ida ba Rejiaun Manatuto, Baucau, Lautém, no Viqueque, Ida ba rejiaun Aileu, Ainaro, Covalima, no Manufahi.

Karreta seluk ba rejiaun Dili, Ermera, Liquiça, no Bobonaro, kona-bá RAEOA maka SAMES koko liu hosi aviaun ZEESM.

Entretantu, iha 11 juñu SAMES sei hahú distribuisaun ba nível munsípiu inklui ba RAEOA ho aviaun ZEESM.

Jornista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here