Vasina AstraZeneca. Imajen TATOLI/António Gonçalves

DILI, 09 juñu 2021 (TATOLI)–Vise Primeiru-Ministru no Ministra Solidariedade Sosiál no Inkluzaun (MSSI), Armanda Berta dos Santos, hamutuk ho ekipa Komisaun Interministeriál ba Elaborasaun no Koordenasaun Ezekusaun Planu Vasinasaun Kontra COVID-19, iha kuarta ne’e, aprezenta pontu situasaun ba ezekusaun planu vasina iha reuniaun Konsellu Ministru  (KM).

“To’o loron 08 juñu, ema hamutuk 93.525 iha país tomak maka simu ona doze dahuluk vasina kontra COVID-19, ne’ebé reprezenta 12% hosi totál populasaun ho tinan 18 ba leten,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha salaun auditóriu Ministériu Finansa (MF).

Notísia relevante: 11 juñu, hahú vasina doze daruak

Enkuantu iha Dili, ne’ebé hanesan munisípiu ne’ebé afetadu liu surtu COVID-19, doze dahuluk fó ona ba ema hamutuk 80.948, ne’ebé reprezenta 40% hosi populasaun ho tinan 18 ba leten.

Nia dehan, iha faze dahuluk, entre loron 07 no 28 abríl, distribui ona vasina ba ema hamutuk 28.412, iha  faze daruak entre loron 10 to’o 28 maiu, totál ema hamutuk 48.170 maka simu ona doze dahuluk.

Nune’e, hahú iha loron 31 maiu to’o 08 juñu, fó ona vasina doze 16.943, entre loron 10 maiu to’o 05 juñu, ema 3.0000 simu vasina kada loron.

Aleinde ne’e, Timor-Leste to’o agora simu ona vasina Sinovac hamutuk doze 100.000 ne’ebé oferese hosi Xina no vasina AstraZaneca 94.000, ne’ebé doze 24.000 to’o ona liuhosi mekanizmu COVAX Facility no 70.000 mak oferese hosi Austrália.

“Hein katak fulan ida ne’e vasina 100.000-resin sei mai tan, liuhosi mekanizmu COVAX nian no apoiu hosi Nova Zelándia,” Portavóz Governu tenik.

Tuir planu vasinasaun, iha munisípiu Dili sei kontinua fó doze dahuluk ba populasaun ne’ebé seidauk simu, ho vasina Sinovac no AstraZaneca, ho vasina ne’ebé mai tan liuhosi mekanizmu COVAX, ne’ebé sei hahú distribui ba faze daruak ho AstraZaneca iha país tomak, ba populasaun ne’ebé vasina ona iha faze dahuluk.

Notísia relevante: Governu sei lansa vasina Sinovac iha 14 juñu

Nune’e mós, sei kontinua distribui mós doze dahuluk iha munisípiu sira seluk no sei fó liu prioridade ba sidadaun sira ho idade 60 ba leten no ho komorbidade.

“Konsellu Ministru manifesta gratidaun ba apoiu sira hotu ne’ebé simu hosi nasaun amiga no parseiru dezenvolvimentu sira ba akizisaun vasina nian,” Ministru subliña.

Governu deside mós katak sei prepara posibilidade atu sosa vasina ba sidadaun sira ho idade 18 mai kraik no prevee posível nesesidade akizisaun vasina ba reforsu imunidade ba tinan 2022.

“Primeiru-Ministru apela ba membru sira Komisaun Interministeriál ba Elaborasaun no Koordenasaun ba Ezekusaun Planu Vasinasaun kontra COVID-19 atu intensifika implementasaun vasinasaun atu hasa’e kuantidade iha kada loron,” nia hatutan.

Governu mós apela ba populasaun sira hotu atu partisipa iha kampaña imunizasaun ne’ebé hanesan fatór determinante atu fila ba situasaun normalidade.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here