DILI, 10 juñu 2021 (TATOLI)—Komisaun A ne’ebé trata asuntu Justisa no Konstitusionál finaliza ona faze audiénsia públika ba pakote lei eleitorál tolu kompostu hosi proposta-lei resensiamentu eleitorál, órgaun administrasaun eleitorál no proposta-lei eleitorál ba Prezidente Repúblika.
Notísia Relevante: Antes resesu, PN fó prioridade ba pakote lei eleitorál
“Kona-ba proposta-alterasaun ba lei resensiamentu eleitorál, órgaun administrasaun eleitorál no proposta-lei eleitorál ba Prezidente Repúblika ne’e ami finaliza ona audiénsia públika, ne’ebé semana oin ami sei haruka relatóriu no paresér ba Prezidente Parlamentu Nasionál,” Prezidente Komisaun A, Deputadu Joaquim dos Santos ‘Boraluli’ informa ba jornalista sira, iha uma fukun, kinta ne’e.
Nia dehan, relatóriu no paresér sei aprova iha tempu badak tanba rona ona fundamentasaun hosi Ministru Administrasaun Estatál nu’udar proponente, eis-titulár sira-ne’ebé nu’udar memória institusionál, CNE, STAE no akademista sira.
“Ami rona tiha ona sira-nia fundamentasaun ba proposta-alterasaun. Ami prevee próxima semana ne’e, ami hatama relatóriu no paresér ba Prezidente Parlamentu Nasionál, depois atu ajenda bainhira ne’e kompeténsia Prezidente Parlamentu Nasionál nian,” nia dehan.
Nia dehan, proposta-alterasaun ba lei ne’e ho karáter urjénsia tanba bainhira Prezidente Parlamentu Nasionál simu ona relatóriu no paresér sei kontinua kedas ba debate jeneralidade.
Notísia Relevante: CNE hato’o paresér ba PN kona-ba pakote lei eleitorál tolu
Jornalista: Evaristo Soares Martins
Editór: Cancio Ximenes
