Vise-Ministra Solidariedade Sosiál no Inkluzaun, Signi Chandrawati Verdial. Imajen/Nelson de Sousa.

DILI, 09 juñu 2021 (TATOLI)—Governu liuhosi Vise-Ministra Solidariedade Sosiál, Signi Chandrawati Verdial, konsidera Parlamentu Nasionál mak iha kompeténsia atu halo alterasaun ba lei pensaun vitalísia tanba serbisu parte ezekutivu ba proposta-lei refere hotu ona.

Notísia Relevante: Komisaun A suspende proposta-alterasaun ba lei pensaun vitalísia

Nia dehan, proposta-alterasaun ne’e Governu submete kleur ona ba Parlamentu Nasionál no parte Komisaun A ne’ebé trata asuntu Justisa no Konstitusionál bolu ona membru Governu tutela.

“Governu iha boa vontade atu submete buat ne’ebé mak ita-nia komunidade no ita-nia populasaun rekere. Entaun ami-nia proposta halo ona kabe kompeténsia Parlamentu Nasionál hodi haree. Hosi parte Governu nian hotu ona, parlamentu presiza lori mai plenária para hodi diskute ba deputadu sira hotu. Depois deputadu sira husu atu Governu atu kompleta liuhosi audiénsia públika,” Signi Chandrawati Verdial informa ba jornalista sira iha Parlamentu Nasionál, kuarta ne’e.

Signi Chandrawati Verdial nu’udar Vise-Ministra Solidariedade Sosiál no Inkluzaun defende ona proposta-alterasaun iha Komisaun A maibé to’o oras ne’e seidauk iha informasaun hosi Parlamentu Nasionál.

Notísia Relevante: Komisaun A Konsidera Lei Pensaun Vitalísia Integra Ba Seguransa Sosiál Pertinente

“Ami submete kleur ona mai iha  ona parlamentu atu ajenda plenária hodi halo diskusaun nomós Komisaun A bele bolu fila-fali membru Governu tutela ne’ebé ké aprezente proposta ne’e. Katak, saida mak hosi parte Governu presiza atu aprezenta tán, nune’e kompleta proposta ne’e,” Vise MSSI fó hanoin ba Komisaun A.

“Defísil ka la desífil ne’e kompeténsia iha Parlamentu Nasionál nian tanba parlamentu mak halo lei. Ami-nia proposta hosi Governu, ami submete ona tuir buat ne’ebé mak ita promete ba povu,” nia reafirma pozisaun Governu nian.

Notísia Relevante: KM Aprova Proposta Alterasaun Lei Pensaun Vitalísia

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here