Komunidade iha suku Comoro, kapitál Dili, troka voucher iha supermerkadu Leader ho produtu Cesta Bázika, kinta (10/12). Imajen TATOLI/António Gonçalves

DILI, 09 juñu 2021 (TATOLI)-Governu liuhosi Ministériu Koodenadór Asuntu Ekonómiku (MKAE), enserra distribuisaun Cesta Bázika iha territóriu nasionál iha fulan ne’e.   

”Ita fixa ona atu termina distribuisaun Cesta Bázika iha fulan-juñu, tanba distribuisaun  atinje ona 98% ka besik ona 100%, tanba kuaze suku sira iha territóriu nasionál kobre hotu ona,” Ministru Koordenadór Asuntu Ekonómiku, Joaquim Amaral, informa ba Agência TATOLI, iha edifisiu Ministériu Finansa (MF), Aitarak-Laran, Dili, kuarta ne’e.

Governante ne’e dehan, falta suku 15 ho aldeia 140 hosi suku 2.000 resin mak seidauk asesu Cesta Bázika, maibé daudaun ne’e ministériu implementadór sira esforsu atu konklui.

Notísia relevante: Distribuisaun Cesta Bázika iha territóriu tomak kuaze konklui

Tuir nia, benefisiáriu hosi suku sira ne’ebé seidauk simu, maioria jeográfikamente difísil atu asesu ba estrada hodi transporta produtu Cesta Bázika.

“Ita espera katak ho númeru ne’ebé oituan ona, ministériu implementadór sira bele distribui hotu iha juñu nia laran ne’e,” nia akresenta.

Governu halo estensaun distribuisaun Cesta Bázika to’o de’it 31 maiu, maibé situasaun atuál difikulta movimentasaun kompãnia fornesedór bá munisípiu atu realiza atividade distribuisaun.

Dadus  benefisiáriu ne’ebé simu ona Cesta Bázika  ho dadus anteriór hamutuk milaun $1,3, maibé sa’e ba milaun 1,5.

“Ita nia benefisiáriu ne’ebé simu Cesta bázika to’o horisehik hamutuk ona abitante 1.350.000, ne’ebé tuir dadus anteriór ho númeru populasaun 1,3, entaun ita atinje ona 100%, maibé númeru populasaun sa’e ba milaun 1,5 ne’ebé besik atu konklui iha fulan ne’e ,” nia hatutan.

Nune’e, governante ne’e kontinua husu ba ministériu implementadór Cesta Bázika atu fasilita empreza distributór sira hodi finaliza distribuisaun tuir tempu.

“Ita hein katak situasaun klima bele ajuda atu transporte bá fatin sira,” Ministru tenik.

Governu rejista benefisiáriu reklamante kuaje 20.000 kompostu hosi 15.000 ne’e hosi Munisípiu Dili no 5.000 hosi Munisípiu sira  seluk

“Ita fó ona instrusaun ba ministériu implementadór sira atubele koordena ho kompañia distributór sira hodi rezolve lalais,” nia subliña.

Notísia relevante: Marsu-maiu, MF halo pagamentu ba kompañia fornesedór Cesta Bázika 106

Ministériu implementadór Cesta Bázika maka Ministériu Turizmu, Komérsiu no Indústria (MTKI), Ministériu Agrikultura no Peska, Sekretaáriu Estadu  Kooperativa (SEKoop), Sekretaria Estadu Ambiente (SEA) inklui Autoridade Rejiaun Administrativa Espesiál Oé-Cusse Ambeno (RAEOA).

To’o loron 18 maiu 2021, MF liuhosi Sekretariadu Tékniku Fundu COVID-19, halo ona pagamentu ba kompañia lokál hamutuk 106 ho valór milaun $26,7 ne’ebé partisipa iha programa Cesta Bázika.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here