Komunidade iha suku Comoro, kapitál Dili, troka voucher iha supermerkadu Leader ho produtu Cesta Bázika, kinta (10/12). Imajen TATOLI/António Gonçalves

DILI, 01 juñu 2021 (TATOLI)–Ministru Koordenadór Asuntu Ekonómika (MKAE), Joaquim Amaral, informa, progresu distribuisaun Cesta Bázika iha territóriu tomak daudaun ne’e kuaze konklui.

“Ita iha 1.270.000 resin benefisiáriu timor-oan ne’ebé mak simu ona Cesta Bázika, se númeru populasaun tomak millaun 1,3, entaun ita atinje ona 97%,” Ministru Joaquim informa iha Colmera, tersa ne’e.

Nune’e, governante ne’e husu ba munistériu implementadór Cesta Bázika atu fasilita kompañia distributór hodi bele finaliza distribuisaun tuir tempu ne’ebé maka determina.

“Serka sanitária impede no iha limitasaun, maibé kompañia sira iha ministériu implementardór atu mobiliza sasán sira no staff sira desloka ba fatin distribuisaun no labele haluhan atu kumpre regra prevensaun COVID-19, nune’e distribuisaun ne’e hotu lalais tuir tempu,” Ministru akresenta.

Antes ne’e, estensaun distribuisaun Cesta Bázika to’o de’it loron 31 maiu, maibé tanba situasaun atuál difikulta movimentasaun kompañia fornesedór ba munisípiu atu realiza atividade distribuisaun.

Ministériu implementadór Cesta Bázika maka Ministériu Turizmu, Komérsiu no Indústria (MTKI), Ministériu Agrikultura no Peska, Sekretaria Estadu Kooperativa (SEKoop), Sekretaria Estadu Ambiente (SEA) inklui Autoridade Rejiaun Administrativa Espesiál Oé-cusse Ambeno (RAEOA).

Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu husi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina-nuu, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.

Enkuantu ba produtu ijiene maka, sabaun, álkool jel, deterjente, eskova nehan no pasta nehan.

Programa Cesta Bázika fixa membru idaidak agregadu familiár sei hetan $25, kada fulan iha fulan-rua nia laran no bele troka ho folin sasán ne’ebé korresponde ba valór osan.

To’o 18 maiu 2021, Ministériu Finansa (MF) liuhosi Sekretariadu Tékniku Fundu COVID-19, halo ona pagamentu ba kompañia lokál hamutuk 106 ne’ebé partisipa iha programa Cesta Bázika ho valór millaun $26,7.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here