Komunidade suku Manleuana, postu adminisrativu Dom Aleixo, troka voucher ho produtu Cesta Bázika iha supermerkadu Leader, tersa (09/02). Imajen Tatoli/António Gonçalves.

DILI, 19 maiu 2021 (TATOLI)–Ministériu Finansa (MF) liuhosi Sekretariadu Tékniku Fundu COVID-19, hahú hosi loron 18 marsu to’o 18 maiu 2021, halo ona pagamentu ba kompañia lokál ne’ebé partisipa iha programa Cesta Bázika ho valór millaun $26,7.

“Pagamentu ne’e halo ba kompaña lokál hamutuk 106, ne’ebé hetan kontratu hosi ministériu implementadór sira hanesan Ministériu Turizmu Komérsiu no Indústria (MTKI) hamutuk millaun $10,6, Sekretaria Estadu Kooperativa (SEKoop) millaun $12,4, Sentru Lojíztika Nasionál (CLN, sigla portugés) millaun $2,2 no Ministériu Agrikultura no Peska (MAP) millaun $1,4,” refere nota imprensa ne’ebé Agência TATOLI asesu, iha kuarta ne’e.

Sekretariadu Tékniku Fundu COVID-19, komprometidu hodi kontinua serbisu hamutuk ho ministériu implementadór sira atu konklui pagamentu ba programa Governu iha ámbitu rekuperasaun ekonómika ne’e.

Iha Orsamentu Jerál Estadu (OJE) Retifikativu 2021, iha mudansa dotasaun orsamentál Fundu COVID-19, ne’ebé ho montante inisiál millaun $31, hetan reforsu millaun $256,6, nune’e totál hamutuk millaun $287,6.

Nune’e, aumentu iha dotasaun Fundu COVID-19 ne’e, fó biban ba Governu hodi aloka tan millaun $31 atu konklui pagamentu programa Cesta Bázika.

Distribuisaun Cesta Bázika atije ona 90%

To’o loron 17 maiu 2021, distribuisaun produtu atinje ona 90%, ho totál benefisiáriu sira ne’ebé simu hamutuk 1.100.000-resin hosi totál 1.500.000.

Iha dezembru 2020, Sekretariadu Tékniku realiza pagamentu ho valór millaun $5,3 ba kompañia lokál hamutuk 46.

Ba kompaña sira ne’ebé mak prosesu pagamentu sei la’o hela, tenke nafatin kumpre dever hodi ba selu impostu rendimentu (income tax) 0,5%, hosi totál rendimentu konforme Lei Tributária haruka.

Hafoin kompañia sira tenke aprezenta resibu pagamentu impostu rendimentu ba Sekretariadu Tékniku Fundu COVID-19, atu nune’e bele realiza pagamentu finál.

Karik kompaña fornesedór sira iha pergunta ruma ka presiza informasaun liután kona-ba asuntu impostu, bele kontaktu Autoridade Tributária (AT) ka vizita portál https://attl.gov.tl/ atu hetan informasaun kona-ba pagamentu impostu, submisaun relatóriu mensál ou anuál inklui pedidu emisaun ba sertidaun dívida.

Pagamentu impostu mós bele halo liuhosi mákina ATM P24, ne’ebé kontribuinte sira la-presiza ba forma tan iha banku komersiál sira hanesan uluk.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here