Vasina AstraZeneca. Imajen Tatoli/Francisco Sony

DILI, 07 juñu 2021 (TATOLI)—Vise-Ministru Saúde, Bonifácio Maucoli dos Reis, hateten iha loron 11 juñu 2021 sei hahú vasina AstraZeneca doze daruak.

“Ita hahú ona vasina doze dahuluk iha 07 abríl no faze daruak nian loloos hahú iha loron 03 juñu, maibé vasina doze daruak seidauk to’o, ne’ebé hosi COVAX Facility sei to’o iha loron 09 juñu ne’e, nune’e loron tuir mai halo distribuisaun no preparasaun lojístika, no loron 11 juñu bele realiza ona vasina doze daruak ba faze dahuluk,” Vise-Ministru Saúde hateten hafoin relata serbisu ministériu ba Primeiru-Ministru (PM), Taur Matan Ruak, iha Rezidénsia Farol, segunda ne’e.

Notísia relevante: PM Taur simu ona vasina dahuluk

Nia hatutan, Governu simu ona vasina ho tipu Sinovac hosi Xina no sei halo hahú lansamentu iha fulan ne’e ba faze dahuluk, ne’ebé tuir alvu ba ema hamutuk 50.000.

“Primeiru-Ministru eziji sidadaun hotu tenke hetan vasina, atu dehan loron hirak liubá ema kuaze 3.000 mak hetan vasina maibé agora to’o 1.000 de’it, tanba ne’e mak hosi Ministériu Saúde buka mekanizmu oinsá maka atu lori sidadaun sira ba vasina,” nia akresenta.

Notísia relevante: Sidadaun 87.230 simu ona AstraZeneca doze dahuluk, MS kampaña doze daruak

Tanba ne’e, mekanizmu ne’ebé MS planeia agora mak atu aumenta postu vasina no pesoál saúde iha área vasina.

Governante ne’e informa ba Xefe Governu katak kada postu vasina, kompostu hosi ema na’in-hitu, ne’ebé na’in-haat hanesan profisionál saúde no na’in-tolu autoridade lokál, no seguransa.

Nune’e, atu hasa’e númeru vasina kada loron maka MS sei halo kampaña liuhosi publikasaun iha mídia eletrónika.

Hahú hosi loron 07 abríl to’o 04 juñu 2021, sidadaun hamutuk 87.230 iha territóriu tomak, ho idade 18 ba leten mak simu ona vasina tipu AstraZeneca doze dahuluk.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here