Governu Xina oferese vasina Sinovac hamutuk doze 100.000 to’o Aeroportu Comoro, iha sábadu (05/06). Imajen Tatoli/Francisco Sony.

DILI, 08 juñu 2021 (TATOLI)—Governu sei halo lansamentu ba vasina Sinovac iha loron 14 juñu, ne’ebé tuir planu sei implementa iha munisípiu Dili.

“Vasina Sinovac ne’ebé oferese hosi Governu Xina hamutuk doze 100.000, ita sei implementa hotu iha munisipiu Dili,” Diretora Jerál Prestasaun Serbisu Saúde, Odete da Silva Viegas, hateten ba jornalista-sira iha rezidénsia Primeiru Ministru (PM), Taur Matan Ruak, Faról, tersa ne’e.

Notísia relevante:Governu Xina entrega vasina Sinovac dozes 100.000 ba Timor-Leste

Vasina Sinovac nia alvu maka, dosente, professor-sira, universitáriu, estudante sekundáriu ho idade 18 ba leten, inklui komunidade xineza.

Odete Viegas esplika, bainhira simu ona vasina Sinovac, iha semana haat de’it bele simu ona segunda doze, maibé AstraZeneca to’o semana ualu mak foin bele simu fila-fali segunda doze.

Implementasaun AstraZeneca la’o di’ak

Durante ekontru ho Primeiru Ministru, Odete Viegas mós aprezenta kona-bá prosesu implementasaun vasina AstraZeneca ne’ebé la’o diak tebes.

Nia dehan, maski númeru kazu pozitivu COVID-19 aumenta beibeik la signifika profisionál saúde-sira la halo serbisu, maibé tenki iha partisipasaun másimu hosi ministériu hotu-hotu inklui reforsa ho sosiedade sivíl, autoridade lokál no komunidade.

Tuir planu, vasina AstraZeneca faze daruak hosi Covax Facility sei hahú iha 10 juñu iha Dili no munisípiu-sira sei hahú iha 14 juñu.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here