Vasina AstraZeneca. Imajen TATOLI/António Gonçalves

DILI, 08 juñu 2021 (TATOLI)-Primeiru-Ministru (PM), Taur Matan Ruak, iha tersa ne’e, konvoka reuniaun ida ho autoridade lokál sira iha Dili, ho objetivu rona preokupasaun komunidade ligadu ho vasina kombate COVID-19.

“Primeiru-Ministru hakarak hasoru malu ho Prezidente Autoridade, Administradór postu no Xefe suku hotu iha munisípiu Dili, hodi fahe ideia ba malu ligadu ho kombate surtu COVID-19, ne’ebé foku ba importánsia vasina tanba ema barak mak tauk vasina, tanba ne’e maka Primeiru-Ministru hakarak rona direta hosi autoridade lokál sira.” Vise-Ministru Administrasaun Estatál, Lino de Jesus Torrezão, hateten hafoin ramata sorumutuk iha salaun auditóriu Ministériu Finansa (MF), Aitarak-laran, tersa ne’e.

Notísia relevante: 11 juñu, hahú vasina doze daruak

Governante ne’e dehan, populasaun barak mak rejeita simu vasina tanba rona informasaun falsa sira, maibé realidade la’o di’ak.

“Implementasaun vasina la’o di’ak no ema barak mós hakarak simu, maibé sira ne’ebé rejeita tanba seidauk hetan informasaun klaru. Tanba ne’e maka Xefe Governu husu autoridade lokál sira koopera ho ekipa ne’ebé hala’o vasina hodi divulga informasaun, nune’e komunidade bele vasina no husu mós atu autoridade sira mobiliza populasaun simu vasina,” nia hatutan.

Iha biban ne’e, Vise-Ministru apela ba populasaun sira, liu-liu iha munisípiu Dili atu hakbesik-an ba sentru vasina hodi simu vasina tanba ida ne’e mak hanesan medida esensiál kontra vírus.

Aleinde ne’e, husu mós ba hirak ne’ebé vasina ona, tenke konvense ema seluk atu vasina, tanba Governu deklara ona ba hirak ne’ebé simu ona vasina kompletu (doze rua), bele livre halo sirkulasaun sein halo teste swab.

Notísia relevante: Governu deklara sidadaun simu vasina kompleta livre sirkulasaun sein teste

Tuir dadus, to’o iha segunda (07/06), ema ho idade 18 ba leten hamutuk 100.000 iha territóriu tomak mak simu vasina tipu AstraZeneca doze dahuluk.

Nune’e, tuir planu iha iha sesta (11/06), sei hahú vasina AstraZeneca doze daruak.

Jornalista: Antónia Gusmão

Editors: Julia Chatarina

HAKEREK NO HATÁN

Please enter your comment!
Please enter your name here