Uma Tradisionál (Casa típica) hosi Munisípiu Lautém kuaze koñesidu iha mundu ne’ebé reprezenta Timor-Leste no sai símbolu ba Timor-Leste nian. Imajen/Espesiál.

DILI, 07 juñu 2021 (TATOLI)—Governu liuhosi Sekretáriu Estadu Arte no Kultura (SEAK), iha fulan juñu ne’e sei fó apoiu halo konstrusaun no inaugurasaun ba uma lulik 42 iha territóriu nasionál. 

Notísia Relevante: SEAK Sei Halo Levantamentu Ba Uma-Lulik Sira Ne’ebé Ahi-Han

Diretór Jerál Arte no Kultura, Manuel Ximenes Smith, hateten SEAK simu proposta hosi komunidade hamutuk 57 ne’ebé ekipa téknika Dirasaun Nasionál Patrimóniu Kulturál halo selesaun ne’e, hato’o ba ekipa avaliasaun ne’ebé mak hetan despaixu hosi Ministru Ensinu Superiór Siênsia Kultura (MESSK), Longuinhos dos Santos, ne’e iha proposta 42 mak prenxe rekezitu.

“Proposta ba uma lulik 57 ne’e ekipa avalia proposta 42 mak pasa. Seluk  ne’e rekomenda ba ekipa tékniku Dirasaun Nasionál Patrimóniu Kulturál hodi halo kontaktu ba proposta na’in sira atu hadi’a, tanba la tuir rekezitu ne’ebé mak hasai iha avizu. Proposta sira-ne’e ita halo avaliasaun hotu ona no halo públikasaun tan ona. Hein para prosesu gasta osan no fó osan ba kontratu ho ema proponente na’in para ita bele aselera halo prosessu pagamentu,” Manuel Ximenes Smith hateten ba Agência Tatoli, iha nia knaar fatin, Avenida Portugal, Dili, segunda ne’e.

Hosi proposta 57 ne’e ekipa avaliasaun halo avaliasaun durante loron haat (4) nia laran to’o ikus proposta 42 mak pasa, proposta 15 seluk suspende tanba proposta sira-ne’e barak liu uza materiál modernu. Tanba, bazea ba rekezitu ne’ebé fó sai katak konstrusaun uma lulik nian tenke konstrui ho materiál lokál.

“Depois ita halo avaliasaun nota katak, iha proposta 15 ne’e deskrisaun detalladu ba materiál konstrusaun sei uza materiál modernu hanesan sementu, besi, zinku. Maibé fila-fali ba haree nia proposta rasik ba prosessu konstrusaun sira konstrui ho sasan tradisionál,” nia informa.

Ho ida-ne’e, ekipa avaliasaun fó rekomendasaun ba dirasaun tékniku sira para halo kontaktu hodi hare’e ba proposta ne’ebé iha deskrisaun materiál la kondis ho prosesu konstrusaun.

Alende proposta ba fó apoiu konstrusaun ka reabilitasaun ba uma lulik, Manuel Ximenes Smith hateten, iha proposta 23 hosi grupu kontemporanea ne’ebé hato’o ba Dirasaun Nasionál Promosaun Arte Kultura hodi hato’o ba ekipa avaliasaun,

“Hosi avaaliasaun ne’e, proposta ne’ebé aprovadu hamutuk 13 no proposta ne’ebé suspende hamutuk 10,” nia dehan.

Entretantu Diretor Nasional Patrimóniu Kultural, Gil Paulino S. Oliveira, mós nahohuk (konkorda) katak daudaun ne’e Governu liuhosi Sekretária Estadu Arte no Kultura aprova ona proposta ba uma lulik hamutuk 42 hosi proponent sira atu konstrui uma lulik ne’ebé prenxe rekezitu ba apoia primeira faze no proposta ne’ebé suspende sei hein ba iha segundu faze.

“Agora daudaun benefisiáriu sira iha hela faze kompleta dokumentu, liu-liu ba sira-ne’ebé seidauk iha konta bankaria atu loke ona konta bankaria, hodi kompleta para iha dentru fulan juñu nia laran bele apoia,” Gil Paulino S. Oliveira hateten.

Orsamentu ba apoia hirak ne’e, nia hateten, kategóriza ba faze tolu mak faze primeiru prosesu konstrusaun hahú hosi 0% to’o 50 % ne’’e konsidera ho orsamentu $3500, segundu prosesu re-konstrusaun ou reabilitasaun haree hosi 50% to’o 80% ne’e konsidera ho orsamentu $2500 no ikus finalizasaun ka inaugurasaun haree hosi 80% to’o 100% ne’e konsidera ho orsamentu $1500.

Ekipa avaliasaun ne’ebé halo avalaisaun ba proposta hirak ne’e mak kompostu hosi Presidente Avaliasaun ba proposta mak Diretór Jerál Arte Kultura, Diretór Administrasaun Finansa, Diretór Aprovizionamentu, Diretór Nasionál Promosaun ba Arte, Diretór Nasionál Patrimóniu Kulturál, ne’ebé hetan mós apoiu hosi Departamentu Asosiasaun Jurídiku hosi Ministériu sai ekipa ida, hodi avalia hela ba proposta maihosi komunidade, inklui mós rezultadu verifikasaun hosi ekipa tékniku hosi Dirasaun Nasionál Patrimóniu Kulturál (DNPK).

Konstrusaun

Uma lulik sira-ne’ebé prenxe rekizitu ba apoia primeira faze hodi halo konstrusaun ba uma lulik mak hanesan uma lulik Fadtutu-Raimansu hosi munisípiu Aileu, uma lulik Dascoli-Darlau-Tartei (Hatuliu)-Berdato hosi munisípiu Ainaro, uma lulik Saeleki Faelolo-Buimana Lacoliu-Barudufu-Uadera (Uma Guarda) hosi munisípiu Baucau, no uma lulik Lugululi hosi munisípiu Bobonaro ba konstrusaun.

Uma lulik Bidau Manu Mata-Maubara-Mane Husuk Lip Lete-Loko Besi hosi munisípiu Díli, uma lulik Metresi Mautai-Hatulelo Maulelo-Maulaku hosi munisípiu Ermera, uma lulik Rumbia Lelakai hosi munisípiu Likisa, uma lulik Tutuafa Maluhira hosi munisípiu Lautem ba kosntrusaun.

Inaugurasaun

Uma lulik sira-ne’ebé prenxe rekizitu ba apoia primeira faze hodi halo inaugurasaun ba uma lulik sira mak hanesan uma lulik Mauhunu-Hohulo-Maulaka Baumeta-Mamamer-Likismeta Tulatakeu-Likiliu Hatu Mau Leru hosi munisípiu Aileu, uma lulik Lekiluru-Watugana Waignasa-Wagarana Uma Tameda-Lariisi Buafalu-Kairedo- Baucai Waigaa-Oma Dai hosi munisípiu Baucau.

Uma lulik Boklelo Manking-Asumau-Baoru hosi munisípiu Díli, uma lulik Bokrai-Airom Lokolesu/Kerelele-Lisober-Lihu Kolimanu-Leobesi-no uma lulik Berleba Mau-Adu hosi munisípiu Ermera ba inagurasaun.

Notísia Relevante: SEAK Simu Proposta Hamutuk 110 Apoiu Uma-Lulik

Jornalista: Nelia Fernandes

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here