Ahi han uma lisan 13 iha Suku Abu, Postu Administrativu Quelicai, Munisípiu Baucau, kuarta dadeer (23/10/2019). Imajen foti hosi kronolojia Facebook Abãs d'Såntòs

DILI, 19 novembru 2019 (TATOLI)—Diretór Jerál Arte no Kultura (SEAK), Manuel Ximenes Smith, hateten SEAK liuhusi Diresaun Jerál fó ona orientasaun serbisu ba iha Diresaun Nasionál Muzeu Biblióteka no Diresaun Nasionál Patrimóniou Kulturál semana ne’e atu ba terrenu hodi halo identifikasaun no halo levantamentu dadus ba objetu kulturál, sasán-lulik, ne’ebé hetan estragu husi inséndiu  iha munisípiu haat.

“Iha munisípiu haat ne’ebé akontese insendiu, afeta maka’as ba ita-nia patrimóniu kulturál  tradisionál. Insendiu ne’e afeta liu ba ita-nia uma-lulik lubuk ida ne’ebé ahi han iha Quelicai hamutuk 15, iha Manatutu hamutuk rua, iha Ainaro Hatubuilico hamutuk rua, no mós Munísipiu Ermera iha uma lulik ha’at mak ahi han,” dehan Manuel Ximenes Smith ba ajénsia TATOLI liuhusi entrevista iha nia kna’ar fatin, Avenida de Portugal, Dili, ohin.

Nia informa, ekipa prepara hela materiál ne’ebé atu lori maka fixa  levantamentu, JPS no makina fotografia ho papel. Materiál sira ne’ebé bele fortifika sira-nia atividade iha baze hodi halo entervista ho lia na’in sira husi kada lulik ida-idak para bele hetan informasaun kona-ba afetasaun ba uma lulik no mós ho sasan lulik sira ne’ebé ahi-han.

Husi Munisipiu haat ne’ebé hetan insendu, nia hatutan, ekipa sei tun ba uluk iha Munisípiu Baucau liuliu iha Postu Administrativu Quelicai. Tanba, tuir nia, postu administrativu refere mak hetan estragus barak liu tanba iha insendiu ne’e ahi han uma-lulik hamutuk 15.

“Liuhusi kontaktu ba iha kolega responsável kultura ba iha Munisípiu Baucau, espera katak sira halo kontaktu ona para atu kanalizasaun to’o iha postu administrativu bele koopera hamutuk. Sira bele fó informasaun to’o ba iha xefe suku no lia na’in sira, atu bele fasilita kolega sira halo serbisu levantamentu sira ne’e,” nia dehan.

Nia hatutan, ekipa ne’ebé ba halo identifikasaun no levantamentu dadus iha terenu sei halo no hato’o rezultadu relatóriu ba Governu liuhusi Sekretária Estadu Arte no Kultura (SEAK) bazeia dadus ne’eb’e hetan  liuhusi partisipasaun no kolaborasaun husi lia-na’in no na’in ba uma lulik sira ne’ebé afeta husi insendiu ne’e.

Tanba, nia dehan, akontesimentu insendiu ne’e la’ós akontese iha Quelicai de’it maibé akontese mós iha Manatuto, Ermera nomós Ainaro. Objetivu husi sensibilizasaun ida ne’e, nia haklaken, los duni katak ahi han duni uma-lulik sira ne’e no iha asidente ida ne’e la notifika katak ema ruma mak halo estraga ka sunu.

“Maibé, momentu ida ne’ebá saída mak SEAK nia intervensaun. Daudaun ne’e, ami prepara ekipa ida atu tun ba halo identifikasaun kona-ba sasán lulik saida mak ahi han. Ita tenke haree uluk iha ne’e tanbá ita proteje valór kulturál tenke haree uluk saída mak ahi han iha ne’ebá. Presiza halo identifikasaun ida ne’e hodi serbisu hamutuk ho uma na’in sira, hodi halo levantamentu no fixa levantamentu,”  nia haktuir.

Iha prosesu levantamentu ne’e, nia haktuir, sei la ko’alia kona-ba ajuda uluk maibé haree uluk kona-ba intervensaun ba sasán lulik sira. Kona-ba ajudu ba uma lulik, nia dehan, uma lulik Governu labele halo entaun Governu sei labele fó fó osan tomak ba benefisiáriu sira atu halo uma lulik, maibé uma-na’in sira mak halo hafoin Governu fó apoiu de’it.

“Entaun, inisiativa primeiru hakarak ka lakohi, feto-san umane, família ne’ebé husi uma-lulik ne’e rasik, sira mak tenke iha inisiativa forte. Governu la fó osan tomak ba harii uma-lulik ba komunidade ne’e, lae. Labele sala entende ida ne’e. Ne’ebé, atu halulik ba uma lulik sira ne’e, ne’e família feto-san umane sira, agora governu nia prezensa iha ne’ebá, dala ruma atu hakmaan de’it sira-nia todan,” dehan diretór ne’e.

Oinsá kona-ba ahi han uma-lulik, nia hatán, husi SEAK ni’an haree de’it kona-ba uma-lulik maibé SEAK la’ós tun ba para fó apoia harii uma lulik. Maibé, tuir nia, SEAK ba halo intervensaun no identifikasaun kona-ba sasán lulik ne’ebé mak ahi han.

“Kona-ba apoiu ne’e halo uma-lulik ne’e liu husi prosesu. Ne’e prosesu ida rigorozu tebes. Presiza ekipa ida tun ba haree fila-fali, halo verifikasaun no diresaun fatin ba sira-nia prosesu konstrusaun no depois Governu bele hare’e no tetu. Halo ekipa avaliasaun ida, hodi avalia para oinsa prosesu sira ne’e bele passa no  bele fó apoiu,” nia dehan.

Jornalista  : Nelia Fernandes

Editór         : Rafy Belo

HAKEREK NO HATÁN

Please enter your comment!
Please enter your name here