Funsionáriu no komunidade antusiazmu simu vasina AstraZeneca iha Sentru Saúde Comoro, kuarta (02/06/21). Imajen Tatoli/António Gonçalves.

DILI, 04 juñu 2021 (TATOLI)—Ministériu Saúde (MS) oferese ona vasina COVID-19 ho tipu AstraZeneca, ba sidadaun hamutuk 87.230 iha Timor-Leste (TL), hosi totál populasaun elijível, hahú hosi 07 abríl 2021 to’o 04 juñu 2021.

Portavóz Komisaun Interministeriál ba vasina COVID-19, Daninha Coelho, esplika númeru vasina bo’ot liu ne’ebé distribui ona maka munisípiu Dili, no prioritiza grupu traballadór saúde, liña frente, ema-sira ho moras króniku no idade 60 ba leten.

Notísia relevante:Sidadaun 76.683 simu ona vasina AstraZeneca doze dahuluk

Daninha Coelho dehan, Governu  kontinua enkoraja ema ho idade 60 ba leten atu mai simu vasina, tanba hakarak atu asegura vasina adekuada ba populasaun hirak ne’ebe elijível iha nasaun ne’e.

”Maibé, ita haree ba munisípiu Dili ema ne’ebé  vasina ona hamutuk 74.659. Ita haree ba persentajen kálkulu populasaun idade 18 ba leten hamutuk 35% mak iha kobertura primeira doze. Hosi ida-ne’e ita haree fali ba populasuan alvu ne’ebé ita hakarak atinji hosi populasaun idade 18 to’o 59 ho moras króniku iha Dili, ita konsege atinji ona 97%. Dadus ne’ebé iha, ema hamutuk 9.578. Hosi ida-ne’e ita vasina ona 9.877,” Daninha Coelho, hateten liuhosi konferénsia imprensa, iha salaun MSSI Caicoli, sesta ne’e.

Parte MS haree katak, númeru ne’ebé  sei menus  maka, ema-sira ho idade superiór 60-resin mak foin iha 19% no dadus ne’ebé iha, ema-sira idade 60 ba leten hamutuk 14.518 no hosi ne’e, vasina ona hamutuk 2.722.

“Ida-ne’e mak Governu esforsu no hakarak halo atu fó kobertura ba ema-sira ne’ebé vunerável. Iha Dili, Governu iha planu atu hahú distribui vasina COVID-19 ba ema hotu-hotu ho idade 18 ba leten hahú semana oin,” nia subliña.

Hosi númeru vasinante, iha mós relatu hamutuk ema na’in 28 mak hetan reasaun adversa, hafoin halo imunizasaun, no kazu hirak-ne’e relata ba Ministériu Saúde ne’ebé hala’o kedan investagasaun ho akompañamentu.

Hosi ema na’in 28 ne’e, ema ne’ebé  hetan reasaun desde vasina dahuluk hosi COVAX Facility hamutuk 11 no  ida de’it mak hetan reasaun alerjika grave depois hetan atendimentu másimu hosi médiku to’o rekoperadu.

Alende ne’e, hosi ema na’in 17 ne’ebé hetan reasaun hosi vasina AstraZeneca ne’ebé oferese hosi Austrália, laiha ema ida mak grave.

Médika Daninha Coelho mós fó-hanoin katak, Primeiru Ministru (PM), Taur Matan Ruak, anunsia ona sei permite ema-sira ne’ebé kompleta ona vasina bele hala’o sirkulasaun livre iha Timor laran, maibé sei nafatin reforsa medida prevensaun-sira hanesan, uza máskara, distansiamentu sosiál no fase liman regulár.

MS hala’o kampaña ba vasina doze daruak

Ministériu Saúde (MS), kontinua hala’o kampaña vasinasaun ba doze daruak ne’ebé tuir planu sei realiza iha semana oin.

Diretora Jerál Prestasaun Serbisu Saúde, Odete da Silva Viegas, hateten serbisu ne’ebé MS kontinua halo maka kampaña vasinasaun ba populasaun hodi hakbesik an ba fasilidae saúde atu simu vasina.

Odete da Silva Viegas esplika, oras-ne’e daudaun sosializasaun hodi halo advokasia ba vasina ne’e, la’ós halo iha Dili de’it, maibé ba munisípiu hotu-hotu no ekipa saúde  tama-sai  suku ho aldeia atu halo sensibilizasaun ba komunidade.

Tuir planu, iha fulan ne’e sei halo imunizasaun  ba vasina  AstraZeneca iha nível nasionál hosi COVAX ne’ebé mai hosi Austrália no Senovax hosi Xina, kontinua nafatin  iha Dili nu’udár episentru ba moras COVID-19.

Durante kampaña, difikuldade ne’ebé ekipa saúde hasoru maka, menus partisipasaun komunidade iha terrenu, maibé la hamate espíritu atu ekipa kontinua halo advokasia.

Tanba ne’e, MS husu ba instituisaun hotu-hotu, sosiedade sivíl no komunidade ne’ebé seidauk hetan vasina atu bele kontribui, nune’e redúz mós númeru moras no númeru mate ho COVID iha Timor-Leste.

To’o oras-ne’e, TL rejista ona kazu COVID-19 konfirmadu hamutuk 7.422 no kazu óbitu hamutuk 16 iha ne’ebé munisípiu Dili mak númeru rejistadu aas liu.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here