Prezidente Autoridade RAEOA-ZEESM TL, Arsénio Paixão Bano. Imajen/ZEESM-TL

DILI, 19 maiu 2021 (TATOLI)-Autoridade Rejiaun Administrativu Rejiaun Espesiál Oé-Cusse  Ambeno (RAEOA) prepara ona fatin kuarentena atu simu Oé-Cuse-oan ne’ebé hakarak fali hosi Dili ba Oé-Cusse.

Liuhosi kronolojia  Facebook Arsenio Bano,  kuarta ne’e, prezidente autoridade RAEOA, Arsénio Paixão Bano rasik haktuir ba Oé-Cuse-oan sira iha Dili katak, Autoridade RAEOA kontinua halo esforsu prepara kondisaun iha Oé-Cusse ho harii kapasidade kuarentena ba ema 100 to’o 200 iha Portu Mahata, hodi bele simu no fasilita pasajeiru-sira hosi Dili ba Oé-Cusse.

Autoridade RAEOA hola inisiativa ne’e atu responde ba espetativa Oé-Cusse-oan sira  nian iha Dili ne’ebé hakarak fila ona ba Oé-Cusse iha situasaun serka sanitária no konfinamentu obrigatóriu ne’ebé implementa iha Dili halo sira-nia moris susar tebes.

Arsénio Paixão Bano hateten iha semana ne’e nia-laran, prosesu konstrusaun kuarentena sei hahú ho objetivu atu kontinua kontrola, prevene no proteje inan-aman sira no populasaun 85.000 iha RAEOA ne’ebé agora daudauk provizoriamente seguru tan laiha transmisaun lokál ka komunitária  COVID-19, tanba ne’e halo kuarentena nune’e moras ne’e labele tama to’o ba komunidade RAEOA tomak.

“Husu ba ita hotu iha Dili kontinua buka dalan hodi hetan vasina AstraZeneca no hakbesik ba Autoridade Governu Sentrál hodi hetan tulun ba ai-han no seluk tan ne’ebé Governu deside ona atu oferese ai-han ona komunidade  hotu-hotu iha Dili,” Arsénio Bano hateten

Nia tenik, autoridade RAEOA sei kontinua informa situasaun ne’e ba Governu Sentrál hodi fasilita tulun ba Oé-Cusse-oan  sira iha kapital Dili. Tanba prioridade importante mak inan-aman no maluk sira 85.000 hela iha Oé-Cusse seguru hosi peste letál  COVID-19.

Prezidente Autoridade RAEOA ne’e hateten, autoridade RAEOA lakohi foti risku hatama komunidade ba RAEOA iha situasaun transmisaun lokál no transmisaun komunitáriu COVID-19 agora ne’e, tanba fasilidade Saúde iha Hospital Oé-Cusse hanesan oksijéniu no ventiladór seluk tan, limitadu tebes.

“Oé-Cusse mós iha komunidade barak iha moras Tuberkuloze, tensaun, hepatitis ne’ebé frajil ba COVID-19 atu oho ema bainhira sira hetan moras COVID-19,” Arsénio Bano hateten.

Bainhira kondisaun kuarentena simente ona, Arsénio Bano hatutan, autoridade RAEOA sei normaliza transporte ema no sasán ba mai Oé-Cusse Dili. Tanba ne’e nai husu pasiénsia hodi bele kontribui hasees Oé-Cusse hosi COVID-19 liuliu transmisaun lokál.

“Maske ita boot sira hirus la gosta desizaun ne’e, maibé prioridade mak ema 85.000 atu labele hetan moras hada’et COVID-19 iha RAEOA,” nia hateten.

Hosi sorin seluk, portavós Movimentu Atoni Oé-Cusse (MAO), Zecafriado Afulit Coa ne’ebé hamutuk ho nia maluk sira seluk, horikalan, toba iha arredores  Edifísiu ZEEMS Nasionál, Farol, Dili, hateten sira nafatin kontinua toba iha arredores edifísiu ZEESM tanba ho razaun Governu Sentrál autoriza ona kada sidadaun ne’ebé hela iha Kapitál Dili atu halo viajen ba ida-idak nia Munisípiu, inklui RAEOA, ho maneira liuhosi Sentru Integradu Jestaun Krize (CIGC-sigla portugés) halo teste swab rezultadu negativu bele ba munisípiu.

“Ami sira ne’ebé horikalan toba iha edifísiu SEEMS halo hotu ona teste swab ho rezultadu negativu no balu simu tan ona vasina AstraZeneca. Ami nafatin toba iha Gabinete ZEEMS Farol, Dili, to’o hetan resposta imediata hosi Prezidente RAEOA,” nia afirma.

Daudaun ne’e Oé-Cusse-oan hamutuk  na’in-100 resin mak hala’o hela protestu iha edifísiu ZEESM, Dili to’o toba tan iha arredores edifísiu ZEESM hodi “reklama” ba Prezidente Autoridade RAEOA atu fasilita transporta sira ba Oé-Cusse ho Ró SUCCES.

Liuhosi kronolojia Facebook Mateus Lopho Abadhy, Oé-Cusse-oan sira ne’ebé halo protestu iha edifísiu nasionál ZEESM iha Farol, Dili,  afirma sira-nia pozisaun katak sira komprometidu la sai hosi arredores edifísiu ZEESM Nasionál  bainhira laiha  desizaun serteza hodi transporta  komunidade no estudante Oé-Cusse-oan  fila ba Ambeno.

“Ami lakohi mantein ho imi nia desizaun, diskrisaun, sistema bei-oan no hahalok neokolonializmu,” haktuir iha kronolojia Facebook Mateus Lopho Abadhy nian.

Iha kronolojia Facebook ne’e, Oé-Cusse-oan sira ne’ebé halo protestu ne’e afirma,    mezmu horikalan,  Polísia Batallaun Orden Públika (BOP) koko atu hasees-sira hosi arredores edifísiu ZEESM, Dili,  maibé sira-nia parte komprometidu no firme se la hamamuk arredores refere to’o bainhira laiha orientasaun hosi autoridade RAEOA atu transporta estudante ho komunidade Oé-Cusse iha Dili fila ba Oé-Cusse ho Ró SUCCES.

“Ami sei la estraga propriedade Estadu nian, ami sei responsabiliza moral ba fatin ne’e, fatin ne’e sei la fo’er no sei la halo barullu.  Bondia RAEOA, Bondia Povu Timor-Leste. M’Lopo-19/05/2021,” haktuir iha kronolojia Facebook Mateus Lopho Abadhy.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here