Komandante Operasaun Nasionál PNTL, Superintendente Xefe, Pedro Belo ho Portavóz PNTL, Superintendente Xefe, Arnaldo de Araújo. Imajen Tatoli/Eugénio Pereira.

DILI, 05 juñu 2021 (TATOLI)—Komandante Operasaun Nasional Polísia Nasionál Timor-Leste (PNTL), Superintendente Xefe, Pedro Belo hateten akontesimentu ajente Polísia ne’ebé ohin madrugada 02:00 tiru mate Mateus de Deus no Camilo de Deus, daudaun ne’e Komandu Jerál halo ona asaun prosedimentu dixiplinár no kriminál ba ajente polísia ne’e hanesan autór.

Notísia Relevante: Primeiru-Ministru kondena aktu ajente PNTL tiru mate sidadaun iha Lahane

“Iha akontesimentu ne’e Komandu rekuñese katak iha duni membru polisia tiru mate ema na’in rua no ida kanek, ida ne’e Komandu PNTL halo ona asaun. Asaun ne’ebé Komandu foti mak prosedimentu kriminál no prosedimentu dixiplinár,” Pedro Belo hateten ba jornalista sira liuhosi konferénsia imprensa iha Kuartél Jerál Caicoli, Dili, sábadu ne’e.

Prosedimentu kriminál, Komandante Jerál orienta ona parte Polísia Sientífiku Investigasaun Kriminál (PSIK) servisu hamutuk hodi hala’o prosesu inisiál ne’ebé oras ne’e duadaun sira la’o hela.

Ba prosedimentu dixiplinár nian, Komandante Jeral PNTL orienta ona departamentu justisa hodi hala’o prosesu inisiál ne’ebé la’o daudaun no iha tempu badak Komadante Jerál sei foti kompeténsia tomak hodi foti dezisaun ba asuntu ida-ne’e.

“Kualker membru PNTL ne’ebé mak viola prosedimentu kriminál no dixiplinár mak Komandante Jerál sei foti ninia kompeténsia tuir buat ne’ebé departamentu justisa hasa’e ba Komandante Jerál nia meza. Ita hotu hein, tempu besik mai sira bele ramata ho prosesu tomak hodi entrega ona ba Ministériu Públiku mak sei entrega ba iha Tribunál. Hosi ne’ebá mak Juis bele foti desizaun tomak ba kazu ne’e,” nia dehan.

Hahalok ajente ka membru polísia ne’ebé tiru mate ema ne’e, prosesu inisial la’o hela maibé lei dixiplinár mós fó dalan ba Komandante Jerál bele foti asaun balu iha tempu badak, maibé kazu ne’e entrega ba prosesu investigasaun.

“Kazu ne’ebé kontinua akontese, relasiona hakanek ema, no hamate ema, ha’u hakarak fó hatene katak ninia prosesu ne’e finalidade iha tribunál. Hanesan hotu-hotu akompaña membru polísia balu ne’ebé involve direta kazu sira-ne’e, ninia paradeiru iha hotu prizaun, ne’ebé buat hotu sei la’o tuir prosesu,” nia hateten.

Kestaun membru Polísia ne’ebé kontinua lori arma ba uma no hanesan akontese ohin maduragada ne’e, nia dehan, prosedimentu kilat ne’e iha duni tanba ne’e mak Komadante Jerál orienta kedas departamentu justisa hala’o prosesu inisiál no Komandante Jerál sei foti dezisaun tuir kompeténsia ne’ebé nia iha.

“Kona-ba lei arma nian la’ós Lei mak la forte, maibé Lei forsa ne’e mak ita hotu hamriik to’o agora ne’e. Se lei la forsa ita namlaek hotu. Tanba ne’e mak ha’u husu ba hotu-hotu katak prosesu inisiál la’o ona ne’ebé iha tempu badak Komandante Jerál sei foti dezisaun tuir nia kompeténsia ne’ebé iha,” nia subliña.

Notísia Relevante: Reprezentante povu ezije Komandu PNTL halo reflesaun sériu ba kazu Lahane

Ba suspeitu, prosedimentu kriminál la’o hela entaun autór daudaun ne’e iha hela investigasaun nia laran, tanba prosesu ne’e la’o tuir ninia prosedura investigasaun nian ne’ebé atu hatene ninia rezultadu ne’e ikus iha tribunál.

“Tanba buat ida segredu justisa ha’u labele ko’alia, ne’ebé ita hotu hein ninia rezultadu ikus ne’e. Tanba ne’e desizaun ikus hotu-hotu bazea ba lei no lei mak deside,” nia dehan.

Entretantu kona-ba públiku ne’ebé kestiona aktu ajente PNTL ne’e hanesan brutalizmu ida, nia dehan, se PNTL ninia membru hamutuk 4.000 ne’e mak mesak ema brutal de’it saida mak akontese ba rai (Timor-Leste) ida-ne’e.

“Instituisaun PNTL ne’e Estadu ninian. Ne’ebé, ba pesoál balu ne’ebé halo aktu la tuir regra ne’e sei prosesu tuir lei ne’ebé iha. Tanba ne’e, labele dehan polisia hotu-hotu nia aktu ne’e brutalizmu,” nia hateten.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here