Imajen/Espesiál.

DILI, 05 juñu 2021 (TATOLI)—Primeiru-Ministru no Ministru Interior, Taur Matan Ruak, lamenta tebes no kondena hahalok elementu ka ajente Polisia Nasional Timor-Leste (PNTL) ne’ebé mak tiru mate sidadaun na’in-rua (2) no ida kanek todan iha Lahane Osidentál, sábadu madrugada ohin.

Notísia Relevante: PNTL sei kompleta investigasaun antes pronúnsia akontesementu iha Lahane

“Ha’u hakfodak no triste rona elementu PNTL ida ohin madrugada hodi arma Estadu nian tiru mate ita-nia sidadaun na’in rua no ida kanek todan iha Lahane Osidental. Ha’u lamenta no kondena tebes aktu refere. Ita hotu la tolera ida-ne’e, no hanesan Primeiru-Ministru no Ministru Interior, ha’u orienta ba Komandu PNTL para dezarma elementu ne’e, hodi halo prosesu investigasaun no hatama ba sela,” Primeiru-Ministru hateten liuhoai komunikadu imprensa ne’ebé Agência Tatoli asesu, sábadu ne’e.

Xefe Governu ne’e mós hato’o profunda sentida kondolénsia ba família vítima hosi akontesimentu ne’e.

“Iha biban ida-ne’e, hodi ha’u-nia naran rasik, no Governu tomak, hato’o mós ami-nia profunda sentida kondolénsia ba familia matebian nian, no husu deskulpa boot ba familia vítima sira ba hahalok ne’ebé involve hosi elementu PNTL ne’e,” Primeiru-Ministru Taur Matan Ruak dehan.

Xefe Ezekutivu ne’e mós kompremitidu, Governu sei hola medida ne’ebé forte hasoru elementu Polisia ne’e hodi bele responsabiliza ba aktu ne’ebé nia halo ona. Governu sei kontinua akompaña prosesu hotu no mós sei apoiu familia matebian nian hodi hetan justisa ba akontesimetu ne’e.

Jornalista: Antónia Gusmão 

Editór: Cancio Ximenes

HAKEREK NO HATÁN

Please enter your comment!
Please enter your name here