Deputadu Bankada CNRT, Adérito Hugo da Costa. Imajen Tatoli/ Egas Cristóvão.

DILI, 05 juñu 2021 (TATOLI)—Reprezentante povu iha uma fukun Parlamentu Nasionál ejize Komandu Polísia Nasionál Timor-Leste (PNTL) lideradu Komisáriu Faustino da Costa, tenke halo reflesaun sériu ba kazu Lahatane tanba membru sira laiha kapasidade kontrola arma.

Notísia Relevante: Primeiru-Ministru kondena aktu ajente PNTL tiru mate sidadaun iha Lahane

Membru Komisaun B ne’ebé trata asuntu Negósiu Estranjeiru, Defeza no Seguransa, Deputadu Adérito Hugo da Costa, kondena maka’as aktu tiru mate ema tanba novidade ladi’ak mai tán hosi polísia.

Eis Prezidente Komisaun B ne’e esplika, dekrtetu-lei númeru 43/2011 (Rejime Jurídiku uza arma) hateten polísia ho forsa iha direitu uza arma, ne’e loos maibé iha polísia no forsa profisionál iha mundu, maske sira iha direitu kaer arma maibé iha regra implementasaun hosi komandu nian.

“Ha’u hanoin ho akontesimentu ida akontese iha ohin madrugada ne’e lamentável tebes. Entaun, Komandu PNTL tenke halo mudansa imediata tanba regra operasionál ne’e komandu mak tenke regula. Komandu PNTL tenke halo reflesaun sériu ba akontesimentu Lahane oinsá uza arma ne’e nune’e labele akontese tán,” Membru Komisaun B ne’e informa ba jornalista sira, iha Dili, sábadu ne’e.

Nia hatutan, loloos membru polísia sira mak asegura orden públika maibé ajente balun komete fali asaun sira-ne’ebé la púdia akontese.

Eis Prezidente Parlamentu Nasionál ne’e husu komandu PNTL atu uza akontesimentu nu’udar reflesaun boot ida tanba formasaun ba polísia sira ho durasaun fulan-tolu la sufisiente.

“Afinál formasaun fulan-tolu ne’e la sufisiente, tenke halo avaliasaun ida sériu ba próxima rekrutamentu, nune’e mós halo avaliasaun ba sira-ne’ebé efetivu hodi fó formasaun kontinuasaun. Formasaun labele para bainhira sira sai hosi asrama hodi simu kilat, tenke kontinua formasaun ho regulár ba nível diviza sira-ne’e. Lae sira nafatin de’it,” Deputadu Bankada CNRT ne’e fó hanoin ba komandu PNTL.

Nia ezije komandu PNTL tenke halo avaliasaun kada loron ba membru polísia sira-nia dezempeñu kada loron, labele hein akontesimentu grave hanesan Lahane ne’e.

Tuir nia, dekretu-lei númeru 43/2011 ne’e fó dalan membru polísia uza arma bainhira deskansa maibé komandu tenke kria regulamentu operasionál nune’e arma labele lori ba uma.

“Ne’e akontese fila-fila ona. Tan ne’e mak ami lamenta tebes akontesimentu ohin madrugada, ne’ebé ke nafatin mai hosi pesoál membru polísia ida, ne’ebé laiha kapasidade atu kontrola arma ne’ebé ke hela ho nia 24 horas. Se arma hela ho sira durante 24 horas tantu hala’o serbisu ka la hala’o serbisu maibé tenke iha formasaun kontinuasaun nune’e sira bele domina oinsá uza kilat, labele hanesan ne’e nafatin de’it,” nia lamenta.

Nia afirma, ajente ne’e uza arma ne’e la apropriadu no husu Komandu PNTL no Komandu F-FDTL tenke kontrola ona arma ho imediata nune’e labele akontese tan novidade tristeza hanesan ne’e.

“Instituisaun rua ne’e loloos tenke hadi’a sira-nia dezempeñu (performance) nune’e povu ne’e fiar. Labele povu haree fali instituisaun ne’e hanesan fali inimigu,” nia dehan.

Membru Komisaun B haree katak, akontese fila-fila ona signifika tenke iha medida adekuada hosi Komandu PNTL.

“Ita haree kazu Kuluhun seidauk lakon hosi ita-nia memória, tuir loloos komandu hosi nível nasionál, nível munisipál, nível eskuadra sira tenke tau atensaun sériu ba atividade membru sira kada loron liga ho arma ne’ebé sira uza. Tenke iha nafatin reflesaun ba sira. Tenke hetan nafatin orientasaun hosi Komandu oinsá disiplina uza arma,” nia propoin.

Entretantu, Vise-Xefe Bankada KHUNTO, Deputadu António Verdiál de Sosusa, manda mensajen ba Agência TATOLI, kondena aktu brutalizmu ne’e.

“Hanesan reprezentante Povu husi Bankada KHUNTO, lamenta tebes hó aktu no atitude brutalizmu hosi ajente PNTL ne’ebe laiha responsabilidade. Tuir loloos PNTL sira mak fó seguransa ba povu, maibe uza fali kilat povu nian hodi hamate fali povu. Ida-ne’e mak sai kestaun ne’ebé presiza polítiku na’in sira tau matan ho seriedade kle’an.

Deputadu António Verdiál husu ba Estadu tenke iha vontade polítika ne’ebe díak hodi hola  asaun rigoroza ba atidude ajente seguransa ne’ebé laiha responsabilidade.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here