Diretór Jerál Dezenvolvimentu Rurál Ministériu Administrasaun Estatál (MAE), Rosito Guterres. Imajen/Espesiál.

DILI, 18 maiu 2021 (TATOLI)—Diretór Jerál Dezenvolvimentu Rurál Ministériu Administrasaun Estatál (DR-MAE), Rosito Guterres, informa fasilitadór na’in-198 ne’ebé atu reforsa ekipa tékniku ba programa konstrusaun “Uma Kbiit Laek”, sei tuir formasaun iha área sosiál, tékniku no finansa nian iha ida-idak nia munisípiu iha fulan ida-ne’’e.

Notísia Relevante: PNDS presiza fasilitadór 198 reforsa ekipa tékniku konstrui “Uma Kbiit Laek”

“Ita-nia kalendáriu fulan abríl nian ne’e formasaun hahú. Maibé, tanba serka sanitária no konfinamentu domisiliáriu, entaun ami muda fali ba 24 maiu ne’e. Formasaun ne’e hala’o durante semana tolu iha ida-idak nia munisípiu. Objetivu hosi formasaun ne’e atu kapasita di’ak liután fasilitadór ida-ida nia área, nune’e sira bele akompaña ba implementasaun konstrusaun Uma Kbiit Laek (UKL) iha munisípiu sira hotu,” Rosito Guterres hateten ba Sgência TATOLI iha nia knaar fatin Colmera, Dili, tersa ne’e.

Agora daudaun, nia dehan, ekipa destakadu sira iha ona fatin Training of Trainer (ToT) tanba ToOT ne’e atu fó kapasitasaun ba ekipa Programa Nasionál Dezenvolvimentu Suku (PNDS) iha munisípiu nian antes fasilitadór sira tuir formasaun.

“Ita-nia planu uluk ne’e, ita hakarak fasilitadór sira tuir treinamentu iha Dili para tékniku lori ba Tibar no área finansa ho sosiál tau ba fatin ketak tan. Maibé, tanba situasaun COVID-19 entaun treinamentu sira-ne’e hala’o iha ida-idak nia munisípiu de’it,” nia esplika.

Teinamentu ida-ne’e, nia dehan, hala’o tuir ida-idak nia área maibé antes treinamentu hahú ekipa hosi MAE sei fó pre-test ba sira, atu nune’e treinadór sira bele identifika kada fasilitadór sira-nia frakeza sira.

“Ita mós fó post-test ba sira tanba ema barak kestiona katak ami hatama ema nonook maibé lae. Tanba, ho situasaun COVID-19 ita taka sai vaga iha kada munisípiu ne’ebé liuhosi email ho nia referénsia lahanesan,” nia esklarese.

Diretór jerál ne’e hateten, kada vaga ba munisípiu ida-ida nia númeru referénsia la hanesan no kada postu administrativu ha vaga tolu ne’ebé hahú rejistu ka simu kandidatu iha loron 20-27 abríl 2021.

Ema sira-ne’ebé aplika ba vaga ne’e hamutuk 1.671 maibé liuhosi selesaun dokumentu to’o ikus ema-ne’ebé pasa ne’e na’in-198, no suplente ba fasilitadór ne’e iha ema na’in-rua (2) ka munisípiu ida-ida mak hamutuk 26.

“Konstrusaun fíziku ba obra Uma Kbiit Laek (UKL) ne’e, sei hah’u konstrui iha fulan jullu tinan ne’e nia laran,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here