Ministru Obra Públika, Salvador Eugênio Soares dos Reis Pires. Imajen TATOLI/Egas Cristóvão

DILI, 02 juñu 2021 (TATOLI)—Ministru Obra Públika, Salvador Eugênio Soares dos Reis Pires, no ninia komitiva, iha segunda ne’e halo vizita ba munisípiu Baucau hodi observa progresu konstrusaun estrada dirasaun Baucau-Viqueque no infraestrutura seluk.

“Projetu fíziku estrada ne’e fahe ba trosu rua, kompostu hosi trosu 1 Baucau-Venilale atinje 18% no trosu 2 Venilale-Viqueque atinje 20%, nune’e ita dehan atinje 17,57% tanba bazeia ba lista ne’ebé iha no fahe ba lote rua ne’ebé persentajen ita foti meadu,” Ministru informa iha resintu Ministériu Finansa, Aitarak-laran, kuarta ne’e.

Notísia relevante: Konstrusaun estrada ligasaun Baucau-Viqueque atinje ona 25%

Konstrusaun estrada Baucau-Viqueque atinje 17,57%

Tuir Ministru, konstrusaun ne’e iha empedimentu oituan tanba situasaun pandemia.

“Situasaun pandemia ita iha empedimentu, entaun vizita ne’e atu haree de’it atividade kontratór sira no rona problema traballadór ne’ebé tauk halo teste swab bainhira atu desloka, entaun ami ko’alia atu metiga situasaun atu dudu projetu ba oin, tanba investimentu estrada importante tebes ba dezenvolvimentu ekonómiku, liu-liu ba munisípiu Baucau no Viqueque,” governante ne’e subliña.

Vizita traballu ne’e, Ministru ba haree mós desizaun realiñamentu, tanba hanesan iha Ualili iha natar lubuk ida no fatin bee dalan.

“Ita tenke halo realiñamentu ba estrada ne’e rasik atu konstrusaun ne’e labele fó impaktu ba ai-horis no komunidade nia natar,” nia akresenta.

Notísia relevante: MOP orienta PMU-COVEC proteje sítiu istóriku

Aleinde ne’e, haree mós rai-ko’ak (gua) besik fatin istóriku iha área Caibulori, postu administrativu Venilale, munisípiu Baucau.

“Planu orijinál la prevee iha dezeñu katak iha gua no hafoin eskalasaun mak foin hatene, maibé kontratór komunika autoridade ambiente hodi haree kedan,” nia hatutan.

Governu liuhosi MOP lansa fatuk dahuluk konstrusaun estrada nasionál ligasaun Baucau-Viqueque, trosu 1 Baucau-Venilale, iha loron 09 agostu 2019.

Estrada ne’ebé konstrui hosi kompañia internasionál, China Overseas Engineering Group (COVEC) ne’e ho naruk kilómetru 58, kompostu hosi trosu 1 kilómetru 23,38 dirasaun Baucau-Venilale no trosu 2 kilómetru 34,62 ho dirasaun Venilale-Viqueque.

Durasaun ba kontrusaun tinan-tolu, hahú hosi agostu 2019 to’o fevereiru 2022.

Projetu konstrusaun ne’e ho totál orsamentu hamutuk millaun $44, ne’ebé maihosi fundu empréstimu Banku Aziátiku Dezenvolvimentu (ADB, sigla inglés) no liuhosi konkursu públiku hosi Komisaun Nasionál Aprovizionamentu no hetan ona vistu préviu husi Kámara Konta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here