Ministru Obra Públika, Salvador Eugênio Soares dos Reis Pires. Imajen TATOLI/Egas Cristovão

DILI, 15 fevereiru 2021 (TATOLI)—Ministru Obra Públika (MOP), Salvador Eugênio Soares dos Reis Pires, orienta ona Unidade Monitorizasaun Projetu (PMU, sigla Inglés) inklui empreza responsável ba projetu, China Overseas Engineering Group (COVEC) hodi koopera ho Sekretáriu Estadu Arte no Kultura (SEAK) atu proteje sítiu istóriku bainhira implementa projetu infraestutura bázika hanesan estrada, ponte no cheia.

Governante ne’e hato’o kestaun ne’e relasiona ho implementasaun projetu reabilitasaun estrada dirasaun Baucau-Viqueque, ne’ebé sobu ona rai-ko’ak (gua) besik fatin istóriku iha área Caibulori, postu administrativu Venilale, munisípiu Baucau.

“Ha’u orienta ona atu sira tenke proteje sítiu istóriku ne’ebé mak iha, nune’e PMU no COVEC hahú koopera ona Sekretáriu Estadu Arte no Kultura atu haree meiu rezolve situasaun ne’e,” Ministru Salvador hateten ba Agência TATOLI, iha Pálasiu Governu, segunda ne’e.

Notísia relevante: Administradór Postu Administrativu Venilale rejeita COVEC sobu sitiu istóriku “Gua-7”

MOP liuhosi PMU no empreza COVEC hahú uza estratéjia hanesan estrada iha área konstrusaun kontinua reabilita maibé hakloot estrada.

“Ita haree sira foin hamoos de’it rai, maibé la ke’e gua iha área Caibulori, ne’ebé PMU no COVEC hahú esforsu atu halo alinñamentu kuaze metru 7 ho naruk kilómetru 1,8, atu sees husi fatin refere,” nia akresenta.

Maibé, ba kestaun ne’e empreza presiza aumenta kustu atu harii moru retensaun tanba iha liman karuk gua ne’e iha rai naruk kuaze metru 7 to’o 8.

“Se la’e ita mantein gua ne’e maibé ita halo estrada mak klo’ot de’it, maibé ida-ne’e kabe ba tékniku sira, enkuantu tuir orientasaun presiza proteje nafatin sítiu istóriku sira,” nia tenik.

Ministru Salvador rekoñese, iha planu inísiu projetu atu loke dalan, PMU la identifika katak iha gua istóriku ida iha ne’ebá no iha parte seluk rai-naruk.

“Foun-foun ne’e autoridade lokál mak hatudu dalan, no bainhira kompañia ke’e mak hetan gua tanba taka-an ona ho du’ut maibé foin hamoos, ne’ebé tenke halo tuir planu proteje sítiu istóriku sira,” nia hatutan.

PMU no COVEC iha ona dezeñu atu halo reabilitasaun maibé área ne’e dook husi ‘Gua-7’ iha área Caibulori postu administrativu Venilale, munisípiu Baucau.

“Dezde inísiu kedan ami identifika no halo reabilitasaun ne’ebé sei desvia dook husi Gua-7,” nia dehan.

Jornalista: Florencio Miranda Ximenes

Editora: Julia Chatarina

1 KOMENTÁRIU

  1. MOP atu halo uma 4000 iha wanhira mak implmenta?komunidade sei hatama dokumentu ba MOP iha tempo badak hodi hetan uma ne’ebe Governo Promete..se Governo La-kohi halo uma ba komunidade,ami povo sei halo karta ida Embaixada Indonesia hodi husu apoiu Presiden Indonesia Ir. Jokowi halo uma ba ami/Povo.Iha Indonesia halo uma juta ba juta deit mos lalais los..ba ita halo 4000 deit ulun moras..los..entao lalika sai Autoridade.susar.

HAKEREK NO HATÁN

Please enter your comment!
Please enter your name here