Inspesaun estrada dirasaun Baucau-Viqueque, tersa (01/06). Imajen/MOP

DILI, 01 juñu 2021 (TATOLI)Ministru Obra Públika, Salvador Eugênio Soares dos Reis Pires, hamutuk ho komitiva, iha segunda ne’e halo inspesaun direta ba konstrusaun estrada nasionál dirasaun Baucau bá Viqueque ho distánsia kilómetru 58, ne’ebé daudaun ne’e ninia progresu atije ona 17,57%.

“Imi hosi imi nia rai, ami agradese tebes tanba mai kontribui dezenvolvimentu infraestrutura no serbisu hamutuk ho ami, ita-boot sira iha esperiénsia barak ona. Tanba ne’e, ha’u husu serbisu di’ak no kualidade, nune’e bainhira estrada hotu bele husik hela obra ne’e ho kualidade, tanba estrada ne’e halo uza osan povu nian,” Ministru Salvador hateten ba Responsável obra sira, hanesan haktuir iha nota ne’ebé Agência TATOLI asesu, iha tersa ne’e.

Nune’e, governante ne’e enkoraja engeñeiru no traballadór sira serbisu ho pasiénsia hodi aprende, tanba liuhosi dalan ne’e mak sai esperiénsia di’ak ba futuru.

“Traballadór sira aprende hamutuk ho engeñeiru sira hosi rai-li’ur, nune’e bele aumenta abilidade,” Ministru akresenta.

Atividade inspesaun ne’e akompaña hosi Diretór Jerál Administrasaun no Finansa, Januário Barbosa, Prezidente Institutu Jestaun Ekipamentu (IGE, sigla portugés), Hermenegilda D. C. Laurentina,inklui vogál sira, Jestór Unidade Manajementu Projetu estrada, Sidónio Amaral Freitas, no tékniku sira.

Estrada ne’e konstrui hosi kompañia internasionál, China Overseas Engineering Group Co, Ltd (COVEG), superviziona hosi kompañia konsórsiu Intercontinental Consultants and Technocrats Pvt Lda, India in Association with Infra Consultant in the Philippines (ICP), no Dezenvolve Timor-Leste (DETILE) Consultant Lda, ne’ebé antes ne’e manán ona konkursu públiku iha Komisaun Nasionál Aprovizionamentu (CNA, sigla portugés).

Orsamentu ba kontrusaun projetu hosi empéstimu Banku Dezenvolvimenru Aziátiku (ADB, sigla inglés) hamutuk millaun $44, ne’ebé kompostu finansiamentu empréstimu regulár millaun $19 no empréstimu konsensionál hamutuk millaun $25 hodi halo atualizasaun estrada.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here