Ferik no katuas-sira forma hela iha BNCTL oin hodi simu subsídiu, tersa (29/12/20). Imajen Tatoli/António Gonçalves.

DILI, 02 juñu 2021 (TATOLI)—Governu liuhosi Institutu Nasionál Seguransa Sosiál (INSS) submete ona dadus terseira idade (idozu) hamutuk 94.000 ba Banku Nasionál Komérsiu Timor-Leste (BNCTL, sigla portugés) no tuir planu sei halo pagamentu ba idozu sira iha territóriu nasionál iha fulan (juñu) ida-ne’e.

Notísia Relevante:  INSS submete dadus idozu 94.000 ba BNCTL atu prodús ATM

“Agora kona-ba pagamentu idozu sira-nian, ami hatama hotu lista idozu hamutuk 94.000 ba Banku Nasionál Komérsiu Timor-Leste (BNCTL) atu hahú halo pagamentu ba ita-nia ferik-katuas sira iha fulan ida-ne’e. Tanba, ita baibain ita halo pagamentu ne’e tinan ida pagamentu halo dala rua,” Prezidente Konsellu Administrasaun Institutu Nasionál Seguransa Sosiál (INSS), Longinhos Armando Leite, Longinhos Armando Leite hateten ba Agência TATOLI iha nia knaar fatin, Caicoli, Dili, kuarta ne’e.

Tuir regra pagamentu ba idozu sira-nian hahú iha fulan-juñu agora, maibé BNCTL mak sei halo pagamentu ba idozu sira tanba INSS nia parte mak prepara dokumentu no submete ba BNCTL.

Nia dehan, dadus hotu-hotu INSS haruka tiha ona ba BNCTL maibé presiza parte rua tuur hamutuk hodi buka mekanizmu oinsá mak halo pagamentu ne’e, tanba Timor-Leste daudaun ne’e iha situasaun estadu emerjénsia ne’ebé Governu aplika hela serka sanitaria no konfinamentu domisiliáriu.  

“Ita sei tuur hamutuk ho BNCTL atu mekanizmu oinsá mak ita bele halo pagamentu ba idozu sira, tanba kazu pozitivu COVID-19 kontinua aumenta loro-loron. Tanba ne’e, ita ho BNCTL hanoin atu prodús ATM ida ba ita-nia ferik-katuas sira maibé durasaun ba tinan ida de’it. Depois bainhira halo ona pagamentu mak haree katak ema-ne’e sei nafatin moris ka lae, se sei moris entaun bele levanta halo ativu fila-fali,” nia dehan.

Notísia Relevante: MSSI Kontinua Verifika Lista Terseira Idade Ne’ebé Mate Ona

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here