DILI, 15 jullu 2019 (TATOLI)-Ministériu Solidariedade Sosiál no Inkluzaun (MSSI) kontinua serbisu hamutuk Xefe Suku hodi halo verifikasaun dadus ba idózus (ferik no katuas) ne’ebé mate ona, atu labele kontinua sai benefisiáriu ba programa governu.
Prezidente Konsellu Administrasaun Institutu Nasionál Seguransa Sosiál (INSS), Longuinhos Armando, esplika, tuir lei benefisiáriu sira iha de’it diretu dala ida hodi simu subsídiu depois mate ona.
“Ezemplu, idózus balun husi janeiru to’o juñu 2019, molok simu subsídiu terseira idade iha fulan juñu, maibé nia mate iha fulan marsu, hau hanoin ida ne’e sira kontinua iha direitu atu simu osan idózus nian, maibé so simu tan dala ida hafoin ba oin sira sei laiha direitu ona,” esplika Longuinhos Armando ba Ajénsia TATOLI, ohin, iha nia serbisu fatin, MSSI, Caicoli, Dili.
Atu elimina lista naran benefisiáriu ne’ebé mate ona, Longuinhos Armando tenik, presiza kontribuisaun família hodi hato’o informasaun ba xefe suku no serbisu MSSI nian iha baze.
Nia hatutan, dalaruma família balun la hato’o entaun prejudika MSSI atu halo atualizasaun ba sistema, tanba ne’e, idózus balun mate ona liu tinan ida, mas naran sei iha sistema baze dadus hodi kontinua simu osan terseira idade.
Prezidente Konsellu Administrasaun Institutu Nasionál Seguransa Sosiál (INSS) ne’e la informa detallu kona-ba total benefisiáriu hira maka mate ona no naran hasai ona husi sistema pagamentu.
Entretantu, total terseira idade no invalidés ne’ebé rejistu hodi sai benefisiáriu ba programa ne’e to’o 2019 hamutuk rihun 97 resin.
Jornalista :Nelson de Sousa
Editór : Francisco Simões
