Deputadu Joaquim Dos Santos, Imajen Tatoli/Antonio Goncalves.

DILI, 01 juñu 2021 (TATOLI)—Reprezentante Povu iha uma fukun Parlamentu Nasionál (PN) sei inísia projetu-lei protesaun labarik iha 2022 hodi regulariza direitu labarik sira iha Timor-Leste tanba durante ne’e labarik barak mak abandona.

Prezidente Komisaun A (ne’ebé trata asuntu Justisa no Konstitusionál), Deputadu Joaquim dos Santos ‘Boraluli’, konsidera lei atu lejizla labarik sira importante, tanba ne’e Parlamentu Nasionál ho Governu tenke inisia inisiativa ida hodi fó protesaun ba labarik sira.

Notísia Relevante: Presiza Baze Legál Proteje no Regulariza Labarik Sira iha Timor-Leste

“Di’akliu Parlamentu Nasionál mak inísia tanba direitu ba sidadaun sira. Ita haree ita-nia oan sira ohin loron ne’e barak abandonadu hosi inan-aman tanba laiha kapasidade atu asegura labarik sira-nia futuru. Ne’ebé, ami (deputadu sira) sei prepara inisiativa ruma ba labarik sira. Se la halo iha tinan ida-ne’e entaun tinan oin (2022) ne’e ita bele haree ona,” Prezidente Komisaun A informa ba Agência TATOLI, relasiona ho selebrasaun loron mundiál ba labarik iha resintu Parlamentu Nasionál, tersa ne’e.

Nia dehan, lei tenke loke dalan nune’e Governu bele kria kondisaun ba labarik sira tanba atu asegura futuru Estadu nian ne’e, iha jerasaun foun sira-nia liman.

“Ita iha lei ba edukasaun, lei ba ema ho defisiénsia, maibé importante mós labarik sira ho joven sira. Joven sira kompostu hosi estudante, joven sira profisionál no joven sira-ne’ebé abandonadu, entaun ita-nia Governu tenke haree buat ida-ne’e. Parlamentu Nasionál nia obrigasaun halo lei atu fó protesaun ba labarik sira, ne’e importante,” nia dehan.

Entretantu, Xefe Bankada Congresso Nacional de Reconstrução de Timorense (CNRT), Deputadu Duarte Nunes, hateten loloos ne’e Governu tenke fó protesaun ba labarik tanba Timor-Leste ratifika ona konvensaun internasional.

“Kuandu implementasaun hosi konvensaun ne’e ladi’ak entaun Komisaun Nasionál Direitu Labarik ne’e mak tenke ko’alia sai ka hatama proposta-lei ruma hato’o mai Parlamentu Nasionál no Governu nune’e ita bele hamutuk hodi fó protesaun ba ita-nia labarik sira,” nia dehan.

Tuir Konstituisaun RDTL artigu 18 (protesaun ba labarik-oan sira) haktuir; 1.) Labarik sira iha direitu ba protesaun espesiál hosi família, komunidade, nomós Estadu, liuliu hasoru hahalok hotu hanesan la tau-matan, diskriminasaun, violénsia, opresaun, abuzu seksuál no explorasaun.;

2) Labarik sira hetan direitu hotu-hotu ne’ebé mundu rekoñese, hanesan direitu sira-ne’ebé hakerek ona iha konvensaun internasionál, ne’ebé estadu aprova no simu ona ka ratifika fila-fila;

3) Labarik hotu-hotu ne’ebé moris iha kazamentu nia laran ka lae, iha direitu hanesan kona-ba protesaun sosiál.

Nasaun Unida adopta Konvensaun Direitu Labarik iha tinan 1989 no bainhira Timor-Leste restaura independénsia iha 2002 no iha tinan ida-ne’e kedas, Governu Timor-Leste aprova Konvensaun ne’e atu sai nu’udár dokumentu universál ida no iha nia laran kontempla ona Labarik sira nia direitu.

Hafoin liu tiha tinan sanulu, iha tinan 2013, Timor-Leste submete ba Komisaun Direitu Labarik nian iha Nasaun Unida, no relatóriu tuir mai kona-ba implementasaun Konvensaun, no hosi ne’ebá Timor-Leste simu rekomendasaun atu dezenvolve Planu Asaun Nasionál ba Labarik.

Iha loron 01 juñu kada tinan, nasaun barak mak komemora hanesan Loron Mundiál ba Labarik sira, atu respeita no hasa’e labarik sira-nia konsiénsia kona-ba direitu labarik sira-nian.

Loron labarik sira-nian ne’ebé selebra iha kada loron 01 juñu kuñesidu hanesan Loron Mundiál Proteje Labarik (no dalaruma temi hanesan Loron Mundiál ba Labarik) ne’ebé deside hosi Woman’s Internasional Democratic Federation durante kongresu tinan 1949 ne’eebé selebra iha Moskow. Loron mundiál labarik nian ne’e, selebra ba dahuluk hahú iha 01 junu 1950.

Notísia Relevante: 2020, MSSI  fó Prioridade ba Esbosu Lei Protesaun Labarik

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here