Vise-Ministra Solidariedade Sosiál, Signi Chandrawati Verdial. Imajen Egas Cristovão

DILI,16 janeiru 2020 (TATOLI)-Ministériu Solidaridade Sosiál no Inkluzaun (MSSI) iha tinan 2020 ne’e sei fó mós prioridade atu haree fila-fali esbosu lei protesaun labarik ne’ebé mak antes ne’e kaduka ona iha Parlamentu Nasionál.

Durante mandatu Governu Konstitusionál daneen iha 2016, Konsellu Ministru aprova ona esbosu lei  ne’e no submete kedas ba Komisaun A PN iha mandatu terseiru lejislatura liubá maibé la konsege deskute no aprova tanba ne’e mak proposta lei ne’e kaduka iha Parlamentu.

Notísia Relevante:PN Sei Diskute Fali Proposta Lei Protesaun Labarik

Vise Ministra, Signi Chandrawati Verdial, hateten iha fulan marsu ka abríl tinan ne’e, MSSI sei hahú konsulta esbosu lei ne’e ho públiku liliu ho ministériu relevante no organizasaun sosiedade sivíl hodi hetan opiniaun atu bele dezenvolve di’ak liután esbosu governu ne’e.

Notísia Relevante:FFKJODB Husu Aselera Lei Kódigu Labarik no Lei Protesaun Labarik

“Hanesan ita hotu hatene proposta lei ne’e hetan kaduka iha mandatu Lejislativa liubá, tanba ne’e depende ba komisaun parlamentu nasionál hakarak Hala’o konjunta ou inisia hosi sira rasik mós bele,”dehan Governante ne’e ba TATOLI, iha Parlamentu ohin.

Notísia Relevante:Parlamentu Hahú Diskute Lei Protesaun ba Labarik hosi Tráfiku Úmanu

Programa konsulta públiku atu haree hodi ajusta artigu 100-resin hosi esbosu ne’e persiza atu aumenta ka elimina baseia ba nesesidades.

Tanba ne’e, Vise Ministra ne’e promete katak iha posibilidade antes tinan ne’e remata governu no parlamentu bele deskute ona esbosu ne’e hodi hetan aprovasaun.

Notísia Relevante:Violénsia Hasoru Labarik “Exesionálmente” Aas iha TL

Entrantu, bainhira esbosu lei ne’e hetan aprovasaun sei promove diretu no prevene labarik sira hosi violasaun no konflitu sira hodi asesu edukasaun, saúde, no seluk tan ho di’ak liután ba futuru.

Jornalista:Nelson de Sousa

Editór:Francisco Simões

HAKEREK NO HATÁN

Please enter your comment!
Please enter your name here