Membru Komisaun A PN, Adriano do Nascimento. Imajen dok. Tatoli

DILI, 01 juñu 2020 (TATOLI)—Reprezentante Povu iha Uma Fukun Parlamentu Nasionál hateten presiza baze legál hodi proteje no regulariza labarik sira iha Timor-Leste tanba labarik sira presiza hetan atendimentu di’ak iha sosiedade.

Notísia Relevante: 2020, MSSI  fó Prioridade ba Esbosu Lei Protesaun Labarik

Iha loron 16 Outubru 2016, Proposta lei Kona-ba protesaun Labarik ne’e hetan ona konsiderasaun no aprovasaun hosi Konsellu Ministru hafoin aprezenta hosi Ministériu Solidaridade Sosiál (MSS) hosi VI Governu konstitusionál. Proposta Lei Protesaun Labarik ne’e submete ba Komisaun A Parlamentu Nasionál iha mandatu terseira lejislatura maibé proposta refere la konsege debate (kaduka hela).

Membru Komisaun A (Justisa no Konstitusionál) PN, Deputadu Adriano do Nascimento, hateten Proposta Lei Protesaun ba labarik ne’e ho objetivu hodi promove labarik sira-nia direitu, prevene ameasa ba labarik sira-nia bein-star, no garante protesaun ba labarik sira ne’ebé mak iha risku no perigu, apoia labarik sira-nia bein-estar no labarik sira-nia dezenvolvimemntu.

“Kuandu lei ida iha ona lejizlatura foun ka troka-malu tinan-lima ne’e kaduka ona katak labele ona deskuti, a não ser aprezenta fali proposta iha peródu tuir-mai, lei ne’e iha 2016 signifika kaduka ona, karik bankada ruma ka deputadu balun aprezenta hodi halo debate. Ha’u hanoin ne’e pertinente maibé haree took ita-nia situasaun agora ba-oin tanba lei ne’e iha tiha ona parlamentu. Espera bankada ka deputadu balu aprezenta depois ita halo de’it aprezentasaun foun. Ha’u hanoin kuadru legál atu proteje labarik sira ne’e importante,” dehan Membru Komisaun A, Deputadu Adriano do Nascimento, informa ba Agência TATOLI relasiona ho komemorasaun Loron Mundiál ba Labarik (01 juñu) iha Parlamentu Nasionál, segunda ne’e.

Membru Komisaun A ne’e fó-sai katak, atu halo aprezentasaun foun ba lei ne’ebé kaduka ona ne’e tenke aprezenta proposta foun.

Nia fó ezemplu, Lei Antí Korrupsaun kaduka tiha ona maibé bankada FRETILIN no PD halo aprezentasaun foun no oras ne’e Komisaun A sei deskuti hela.

Xefe Bankada FRETILIN, Deputadu Francisco Miranda Branco, fó parabéns ba labarik sira iha mundu tomak no espesialmente labarik sira iha Timor-Leste.

“Ami hakarak sauda labarik sira iha mundu tomak, liuliu labarik sira iha Timor-Leste. Maibé hanesan polítiku ha’u mós sente todan atu selebra loron ida-ne’e, labarik hanesan futuru nasaun ida-ne’e ninian ne’ebé ita sei enfrenta má-nutrisaun boot. Ita sei enfrenta kondisaun eskola sira-ne’ebé ladi’ak, kondisaun báziku seluk hanesan bee-moos laiha. Ita sei enfrenta sala aula ne’ebé laiha espasu ba estudante sira hotu-hotu hodi bele uza sira-nia direitu Liberdade atu sai futuru nasaun ida-ne’e ba-oin,” dehan Xefe Bankada FRETILIN ne’e.

Entretantu, Xefe Bankada Partidu Demokrátiku (PD), Deputadu António da Coneiçeicão, hato’o parabéns ba loron mundiál labarik sira-nian no apela ba governu liuhosi Ministériu Edukasaun (ME) atu dezenvolve nafatin polítika hodi benefísia labarik sira.

“Ministériu Edukasaun presiza dezenvolve nafatin polítika hodi benefísia labarik timoroan hotu iha sira-nia prosesu atu aprende, prosesu atu moris iha sira-nia família, moris iha komunidade hodi tabik-malu iha nasaun RDTL tanba labarik sira mak futuru nasaun ida-ne’e nian,” nia dehan.

Iha fulan Jullu 2017, Komisária Komisaun Nasionál Direitu Ba Labarik, Dinorah Granadeiro, hala’o diskusaun ho Komisaun F Parlamentu Nasioonál ne’ebé trata Asuntu Edukasaun no Saúde atu halo revizaun ba artigu balu hosi artigu 100-resin molok submete ba plenária PN.

Hosi Ministériu Sosiál Solidariedade Inkluzaun (MSSI), iha fulan Janieru 2020 nia hahú, fó prioridade no lori fila esbosu Lei Protesaun Labarik ne’ebé antes ne’e kaduka iha Parlamentu Nasionál.

Antes atu lori ba Parlamentu Nasionál, tuir planu, iha fulan Marsu-Abril 2020, MSSI sei hala’o konsluta Esbosu Lei Protesaun ba Labarik ne’e ho públiku liuliu ho minsitériu relevante no sosiedade sivíl sira atu bele dezenvolve esbosu Governu ne’e maibé to’o agora seidauk hetan rezultadu.

Antes ne’e, Timor-Leste adota Konvensaun Direitu Labarik iha tinan 2013, ne’ebé Nasaun Unida adota iha 1989 hodi fó protesaun ba labarik sira.

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here