Ministru Administrasaun Estatal (MAE), Miguel Pereira de Carvalho . Imajen/Media MAE.

DILI, 01 juñu 2021 (TATOLI)—Ministru Administradór Estatal, Miguel Pereira de Carvalho, submete ona lista kandidatu aprovadu Prezidente Autoridade Munisipál no Administradór foun na’in-haat (4) ba Konsellu Ministru (KM) hodi halo deliberasaun.

Munisipál haat ne’e komposta hosi Prezidente Autoridade Munisipál Bobonaro, Ermera no Administradór Administrasaun Munisipál Liquiçá no Manatuto.

Notísia Relevante: Ekipa MAE halo ona apresiasaun ba kandidatu aprovadu PAM-AM

“Agora daudaun prosesu rekrutamentu termina ona ba munisípiu Manatuto, Dili, Ermera, Liquiçá no Bobonaro no ha’u haruka ba ona Konsellu Ministru atu halo deliberasaun ba munisípiu haat (4) nian. Agora falta de’it Konsellu Ministru marka ajenda halo deliberasaun hodi eskolla kandidatu aprovadu hodi sai nu’udar administradór ka prezidente autoridade,” Ministru Administrasaun Estatal informa ba jornalista sira, bainhira audiénsia ho Komisaun A kona-ba projetu-lei podér lokál no desentralizasaun administrativa, iha uma fukun, tersa ne’e.

Lista ba munisípiu haat ne’e MAE lori tiha ona ba Konsellu Ministru iha loron 10 fulan-maiu 2021 ne’e, agora falta de’it ajendamentu hodi diskute no aprova kandidatu aprovadu sira, hodi sai hanesan administradór ka prezidente autoridade foun.

Entretantu, lista aprovadu kandidadtu Prezidente Autoridade Munisípiu Dili nian seidauk submete ba Konsellu Ministru tanba Munisípiu Dili sei iha konfinamentu domisiliáriu obrigatóriu nia laran, tanba Konsellu Konsultivu Munisipál Dili labele halo reune.

“Konsellu Konsultivu Munisipál Dili labele reune tanba labele halibur ema barak entaun prosesu Dili nian sei atraza uitoan tanba sei hein paresér hosi Konsellu Konsultivu Munisipál Dili nian mas em prinsípiu prosesu rekrutamentu hotu ona,” nia dehan.

Notísia Relevante: Konsellu konsultivu munisípál seidauk halo apresiasaun ba kandidatu PAM Dili

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here