Vice-Ministru Administrasaun Estatál, Lino de Jesus Torrezão. Imajen Tatoli/Antónia Maia Gusmão.

DILI, 11 maiu 2021 (TATOLI)—Vise-Ministru Administrasaun Estatál (MAE), Lino de Jesus Torrezão, hatete grupu tékniku MAE nian seidauk realiza Konsellu Konsultivu atu halo apresiasaun ba kandidatu aprovadu Prezidente Autoridade Munisípiu (PAM) Dili tanba serka sanitária no konfinamentu obrigatóriu iha pandemia COVID-19 ne’e.

Notísia Relevante: Ekipa MAE halo ona apresiasaun ba kandidatu aprovadu PAM-AM

“To’o agora grupu traballu tékniku ministériu nian seidauk bele realiza konsellu konsultivu atu halo apresiasaun ba kandidatu aprovadu tanba serka sanitária,” Lino de Jesua Torrezão hateten ba Agência TATOLI, liuhosi telefónika, tersa ne’e.

Lino de Jesus Torrezão hateten, kandidatu sira ba Prezidente Autoridade Munisípiu Dili seidauk tama iha faze final tanba sei hein fali Konsellu konsultivu munisipál Dili ninian atu halo apresiasaun no bainhira aprova ona mak hafoin bele submete ba Konselllu Ministru.

Kona-ba naran kandidatu balun ne’ebé ema fó parabens liuhosi rede sosiál, nia dehan, tanba sira la hatene prosesu ba rekrutamentu vaga Prezidente Autoridade Munisipál no Adminiatradór Munisipál nian, tanba ne’e balun komesa kongratula ona maibé tuir loloos seidauk iha rezultadu final tanba serka sanitária entaun parte relevante seidauk forma konsellu konsultivu.

Aleinde ne’e, Governante ne’e hateten, prosesu ba kandidadatu Prezidente Autoriadade Munisípiu no Administradór Munisípiu balun ne’e, agora iha ona faze finál tanba grupu tékniku ministeriál lori ona rezultadu ba konsellu konsultivu iha Munisípiu Liquiça, Manatuto, Bobonaro no Munisípiu Ermera, tanba kandidatu sira-ne’e hetan ona apresiasaun.

“Semana ida-ne’e nia-laran, parese ke lori ona ba Konsellu Ministru ne’ebá mak hafoin Konsellu Ministru mak sei nomeia Prezidente Autoridade Munisípiu no Adminiatradór Munisípiu nian no mós sei enzonera Prezidente Autoridade Munisípiu no Adminiatradór munisípiu ne’ebé mak nia mandatu ramata ona,” Lino Torrezão hateten.

Munisípiu haat ne’e lori hotu dala ida ba Konsellu Ministru so Munisípiu Dili de’it mak seidauk maibé sei hein fali Konsellu konsultivu munisipál Dili ninian bainhira serka sanitária ne’e ramata ona.

Nia informa, Munisípiu Dili aprovadu iha ema na’in-lima (5), Bobonaro na’in-haat (4), Ermera na’in-lima (5), Liquiça na’in-lima (5) no Munisípiu Manatuto ema na’in-haat (4).

Notísia Relevante: Konsellu Konsultivu sei diskute kandidatu aprovadu ba PAM tolu-AM rua

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here