Vice-Ministru Administrasaun Estatál, Lino de Jesus Torrezão. Imajen Tatoli/Antónia Maia Gusmão.

DILI, 30 marsu 2021 (TATOLI)—Vise-Ministru Administrasaun Estatál (V-MAE), Lino de Jesus Torrezão hateten, horisehik, Ekipa Tékniku Interministeriál Ministériu Administrasaun Estatál halo ona apresiasaun ba kandidatu aprovadu Prezidente Autoridade Munisípiu tolu (3) no Administratdór Munisípiu rua (2).

“Horisehik, ami halo ona apresiasaun ba kandidatu aprovadu sira hosi Prezidente Autoridade Munisípiu tolu mak Munisípiu Dili, Ermera no Bobonaro, no Administradór Munisípiu rua (2) mak Liquiça no Manatuto,” Lino de Jesus Torrezão informa ba Agência TATOLI, liuhosi telefónika, tersa ne’e.

Vise-Ministru ne’e hatutan, apresiasaun ne’e finaliza ona no ekipa MAE kontinua lori lista kandidatu aprovadu sira-nian ne’e sei aprezenta ba Konsellu Konsultivu Munisípál, maibé tanba lockdown hela mak ekipa MAE sei ba direta entaun sei la akumula ema barak.

“Konsellu konsultivu munisipál sira-ne’e kompostu hosi xefe suku, partidu polítiku, sosiedade sivíl inklui ho relijiozu sira, ita haree barak liu entaun viola regra serka sanitária. Enatun, ita presiza de’it ema ida ka rua hosi kada postu administrativu atu bele partisipa iha reuniaun Konsellu Konsultivu Munisipál nian,” nia hateten.

Tuir nia, bainhira atu fó apresiasaun ba kandidatu aprovadu sira-ne’e tenke haree hosi nia koezaun ho koerénsia, orijinál hosi munisípiu ne’ebé nia kandidata-aan ba no tenke iha integridade no mós iha nia lideransa, hodi nune’e bele dezenvolve duni munisípiu ne’ebé nia atu lidera ne’e.

Bainhira konsellu Konsultivu hetan tiha apresiasaun, atuál Presidente Ekipa Tékniku Interministerál ne’e dehan, ekipa tékniku sei rekomenda naran kandidatu sira-nian ne’e ba Konsellu Ministru no Konsellu Ministru mak sei deside sé mak atu sai Prezidente Autoridade no Adminiatradór munisípiu.

Antes ne’e, Prezidente Autoridade Munisipál Dili nian iha kandidatu hanesan Guilhermina Filomena Saldanha liu ona iha selesaun eskrita ho valór ezame klasifikasaun kuantitativa 13.6 tanba resposta loos ba pergunta hamutuk 68.

Enkuantu kandidatu na’in tolu seluk mak António Moniz Calau hetan valór hanesan 13.2 no Ivete de Fátima Sarmento de Oliveira, fó resposta loos ba pergunta hamutuk 66.

Nune’e mós, kandidatu Sabino da Costa hetan valór 11.8 tanba fó resposta loos ba pergunta hamutuk 59, kandidatu Manuel da Silva hetan valór 10 tanba fó resposta loos ba pergunta 50.

Entretantu, kandidatu hosi parte Munisípiu Liquiçá nian kompostu hosi António da Silva Pinto hetan klasifikasaun kuantitativa 12.4 fó resposta loos ba pergunta 62, João Alegria de Jesus hetan klasifikasaun kuantitativa 12.2 pergunta 61.

Nune’e mós João Barreto hetan klasifikasaun kuantitativa 15 tanba fó resposta ba pergunta 75 no Pedro Paulo Gomes hetan klasifikasaun kuantitativa 15.8 tanba fó resposta loos ba pergunta 79.

Jornalista:  Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here