Madre no labarik sira bainhira prepara hela hodi simu vizita hosi espoza Preidente Republika, Cidália Nobre Lopes Mouzinho Guterre iha Orfanatu Madre Alma iha Praia Coqueiros, Dili. Imajen Tatoli/Antonio Goncalves.

DILI, 01 juñu 2021 (TATOLI)—Komisária Komisaun Direitu Labarik (CDC-sigla portugés), Dinorah Granadeiro, hateten Governu sei esforsu atu labarik sira bele asesu ba edukasaun liuhosi programa “Tele-Eskola” (Esskola hosi Uma) iha pandemia COVID-19 nia laran ne’e.

Notísia Relevante: Parlamentu Nasionál sei inísia projetu-lei protesaun ba labarik sira

“Labarik barak mak sei la’o iha dalan ninin no la asesu ba edukasaun. Maibé, Governu liuhosi Ministériu Solidaridade Sosiál no Inkluzaun (MSSI) hamutuk ho Konsellu Nasionál Direitu Labarik (KNDL) esforsu atu oinsá labarik sira-ne’e bele asesu ba eskola iha situasaun pandemia COVID-19,” Dinorah Granadeiro hateten ba jornalista sira, iha konferénsia imprensa relasiona ho selebrasaun loron mundiál labarik (01/04) ho tema ““Labele Husik Labarik Sira Sai Vítima ba Aspetu Hotu iha Pandemia COVID-19 no Kalamidade”, iha eis Ospitál Militár, Lahane, Dili, tersa ne’e.

Governu liuhosi Ministériu Edukasaun Juventude no Desportu (MEJD) halo ona programa ”Tele-Eskola” atu fasilita labarik sira eskola hosi uma, maibé inan-aman sira laiha vontade atu suporta no akompañia oan sira tuir eskola liuhosi televizaun ka internet, entaun ida-ne’e mós sai hanesan problema ida-ne’ebé durante ne’e labarik sira enfrenta.

“Ita-nia Governu halo ona programa hodi labarik sira aprende maibé presiza mós inan-aman nia apoiu mak bele susesu iha prosesu aprendizajen liuhosi televizaun sira. Tanba ne’e, husu ba inan-aman atu akompaña oan sira atu estuda iha uma no ajuda oan sira atu dezenvolve oráriu sira, atu oan sira bele hatene tempu halimar, estuda, han no deskansa,” nia dehan.

Iha selebrasaun loron mundiál labarik ba dala-32 ne’e, KNDL hamutuk ho MSSI deside hala’o atividade vizita iha sentru amigável tolu (3) mak sentru amigável iha eis ospitál Lahane, Eskola Politékniku Hera ne’ebé estabelese hafoin inundasaun, no vizita sentru amigável 4 Setembru Balide no iha FOKUPERS.

Liuhosi vizita ida-ne’e, nia dehan, hatudu katak Estadu ida-ne’e rekoñese labarik sira-nia prezensa no tau labarik sira ba prioridade.

Entretantu, kona-ba Lei Protesaun Labarik, Komisária KNDL ne’e hateten Parlamentu Nasionál mós tau ona prioridade iha ajenda, nune’e bele finaliza lei refere tanba lei ne’e mak sai baze legál ida instituisaun sira-ne’ebé mak iha responsabilidade ba labarik sira no Komisaun F mós halo ona revizaun ba lei refere.

Aleinde ne’e, nia informa, dadus traballu infantil iha territóriu nasionál ne’e KNDL seidauk rekolla hotu, maibé tuir dadus ne’ebé ekipa KNDL rekolla iha munisípiu Dili ne’e labarik hamutuk 300 mak hala’o servisu iha Dili laran.

Notísia Relevante: MAPKOMS iha inisiativa halo programa edukasaun sívika ba labarik

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here