Labarik sira halimar no halo ezersísiu iha jardín Colmera. Imajen TATOLI/António Gonçalves

DILI, 31 maiu 2021 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, kompromete hakarak komunika ho Rádiu Televizaun Timor-Leste, Empreza Públika (RTTL, E.P) hodi halo programa espesífika ruma ba labarik.

“Ha’u sei ko’alia ho RTTL, E.P hodi halo programa espesiál ida hanesan edukasaun sívika ba labarik atu konsensializa labarik sira no fó hanoin ba sira,” Ministru informa ba Agência TATOLI, iha Ministériu Finansa, Aitarak-laran, segunda ne’e.

Hanoin ne’e relasiona ho selebrasaun loron nasionál labarik iha 1 juñu, ne’ebé iha biban hanesan Ministru felisita labarik sira.

“Ha’u hakarak fó parabéns ba labarik sira iha loron nasionál, ne’ebé sira halo knaar hanesan labarik iha família nia laran, tanba ne’e presiza nafatin fó protesaun ba sira ne’ebé maka estuda, tantu halimar iha uma no husu ba inan aman atu fó protesaun ba sira,” nia akresenta.

Tuir governante ne’e, tempu labarik sira eskola la’ós obriga halo serbisu, tanba ne’e husu inan-aman sira atu kria kondisaun.

“Inan-aman sira tenke fó kondisaun ba oan sira atu haruka sira ba eskola, atu nune’e sira ba goza direitu ne’ebé mos hanesan no labele obriga sira atu halo fali serbisu ne’ebé maka ema boot bele halo,” nia subliña.

Nasaun Unida adopta Konvensaun Direitu Labarik iha tinan 1989, ne’ebé Timor-Leste restaura independénsia iha tinan 2002 no iha tinan ida kedas, Governu aprova Konvensaun ne’e, atu sai nu’udár dokumentu universál ida no iha nia laran komtempla ona Labarik sira nian direitu.

Tinan sanulu liu, iha tinan 2013, Timor-Leste submete ba Komisaun Direitu Labarik nian iha Nasaun Unida, no relatóriu tuir mai kona-ba implementasaun Konvensaun, no hosi nebá Timor-Leste simu rekomendasaun atu dezenvolve Planu Asaun Nasionál ba Labarik.

Aleinde ne’e, Timor-Leste adota no implementa instrumentu jurídiku lubuk ida, ne’ebé ajuda hadi’a no hametin liu tan protesaun ba Direitu Labarik ne’ebé komtempla ona iha Konvensaun.

Planu Asaun Annuál ba Labarik iha períudu 2016-2020 reflete vontade Governu Timor-Leste atu harii ambiente ne’ebé sei haforsa respeitu, protesaun no kumprimentu direitu Labarik Feto no Labarik Mane sira, iha paíz, liu-liu hirak ne’ebé moris iha situasaun ladún favorável no iha área remota sira.

Tuir peskiza Organizasaun lnternasionál Traballu hamutuk ho Dirasaun Jerál Estatistika iha tinan 2016, rezultadu katak  traballadór infatil iha Timor-Leste hamutuk 68.000 (16,1%) ne’ebé maizumenu 12,5% hosi labarik sira tinan 5 to’o 17 mak konsidera hanesan traballu infantil.       

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here