Primeiru-Ministru, Taur Matan Ruak, prezide reuniaun Konsellu Ministru extraordinaria, iha salaun Ministériu Finansa, Aitarak-laran, segunda (31/05). Imajen TATOLI/Egas Cristóvão

DILI 31 maiu 2021 (TATOLI)—Governu liuhosi reuniaun Konsellu Ministru (KM) aprova Projetu Rezolusaun  Governu ne’ebé mantein impozisaun serka sanitária iha munisípiu Dili, Bobonaro no Covalima ba loron 14.

Serka sanitária ne’ebé vigora iha munisípiu tolu ne’e to’o 01 juñu, tanba ne’e bainhira estende maka to’o loron 15 juñu 2021.

“Nune’e, bandu sirkulasaun ema iha munisípiu sira ne’e no sirkunskrisaun administrativa sira seluk, exetu iha kazu hirak ne’ebé ho fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku, ka razaun seluk ne’ebé presiza atu hala’o ba interese públiku nian,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha salaun auditóriu Ministériu Finansa (MF), Aitarak-laran, segunda ne’e.

Notísia relevante: Serka sanitária iha munisípiu tolu mantein to’o 01 juñu

Enkuantu, estensaun serka sanitária ba munisípiu Baucau no Viqueque ba tempu badak tanba situasaun hahú di’ak.

“Iha munisípiu rua ne’e ita renova hikas serka sanitária maibé ho durasaun loron hitu de’it tanba situasaun hahú di’ak daudaun, kontráriu ho munisípiu Dili, Bobonaro no Covalima ne’ebé númeru aumenta tan. Tanba ne’e, Governu husu ba sidadaun iha munisípiu tolu atu halo esforsu hotu hodi hakotu transmisaun vírus, nune’e bele normaliza hikas iha tempu badak,” Portavóz Governu ne’e akresenta.

Aleinde ne’e, iha munisípiu Dili mós mantein nafatin impozisaun konfinamentu domisiliáriu jerál ba ema hotu ne’ebé hela ka oras ne’e daudaun iha hela munisípiu Dili, exetu tanba razaun saúde, serbisu no asesu sasán no servisu sira ne’ebé sai hanesan nesesidade bázika no atu partisipa iha selebrasaun sira karris relijiozu no eventu kultu sira seluk.

Notísia relevante: Governu deside reativa atividade relijioza iha Dili maibé mantein distánsia

”Rejista de’it alterasaun ida, ho autorizasaun ba sidadaun sira bele auzenta husi sira-nia rezidénsia hodi realiza resenseamentu eleitorál,” governante ne’e subliña.

Tuir aprezentasaun CIGC ba membru KM, iha loron 14 ikus ne’e, hahú hosi loron 17 to’o loron 30 maiu, rejista ona infetadu COVID-19 ho totál hamutuk 2.432 iha territóriu tomak, ne’ebé hosi númeru ne’e hamutuk kazu 2.043 rejista iha Dili, iha Bobonaro 131, Covalima 81, iha Baucau 55 no Viqueque 53.

Dezde inísiu pandemia iha 21 marsu 2020 to’o agora, deteta ona ema infetadu COVID-19 hamutuk 6.615.

Daudaun ne’e iha kazu ativu iha país hamutuk 2.648, ne’ebé munisípiu sira ne’ebé ho kazu ativu liu maka hanesan iha Dili hamutuk 2.079, Baucau 179, Covalima 150, Bobonaro 126 no Viqueque 35.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here