Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos, prezide reuniaun Konsellu Ministru, iha salaun Ministériu Finansa, Aitarak-laran, kuarta (26/05). Imajen TATOLI/Egas Cristóvão

DILI, 26 maiu 2021 (TATOLI)—Konsellu Ministru (KM) aprova Projetu Rezolusaun Governu kona-ba mantein impozisaun serka sanitária iha munisípiu tolu hanesan Baucau, Covalima no Dili to’o tuku 23:59 loron 01 juñu 2021.

Desizaun ne’e Governu foti hafoin analiza aprezentasaun hosi koordenadór sira hosi Sala Situasaun-Sentru Integradu Jestaun Krize (SS-CIGC, sigla portugés), kona-ba pontu situasaun epidemiolójika iha Timor-Leste.

Ministru Prezidénsia Konsellu Ministru, Fidelis Manuel Leite Magalhães, hateten, desizaun ne’e inklui mós impoin hikas serka sanitária iha munisípiu Bobonaro no Viqueque, entre tuku 00:00 loron 27 maiu to’o tuku 23:59 loron 01 juñu 2021.

“Nune’e, nafatin bandu sirkulasaun ema entre munisípiu Baucau, Bobonaru, Covalima, Dili no Viqueque no sirkunskrisaun administrativa sira-seluk, exetu iha kazu ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun husi sistema sira abastesimentu públiku, ka razaun seluk ne’ebé presiza atu hala’o ba interese públiku nian,” Ministru informa hafoin ramata reuniaun ezekutivu iha salaun Ministériu Finansa (MF), Aitarak-laran, kuarta ne’e.

Aleinde ne’e, mantein impozisaun konfinamentu obrigatóriu iha munisípiu Dili to’o tuku 23:59 loron 01 juñu 2021.

To’o iha kuarta (26/05), SS-CIGC rejista kazu foun COVID-19 hamutuk 231, ne’ebé iha Dili hamutuk 215 no munisípiu seluk 16, ne’ebé hosi totál kazu detetadu ne’e mane 114 no feto 117.

Enkuantu, kazu rekuperadu ohin loron hamutuk 158, nune’e kazu ativu ne’ebé baixa iha sentru izolamentu hamutuk 2.739, no totál kazu kumulativu hosi marsu 2020 to’o ohin hamutuk 6.245.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here