Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos, prezide reuniaun Konsellu Ministru, iha salaun Ministériu Finansa, Aitarak-laran, kuarta (26/05). Imajen TATOLI/Egas Cristóvão

DILI, 26 maiu 2021 (TATOLI)—Reuniaun Konsellu Ministru (KM) iha kuarta ne’e, deside reativa atividade relijioza iha munisípiu Dili, liu-liu selebrasaun misa iha domingu ne’ebé antes sarani sira akompaña de’it hosi televizaun no rádiu.

Desizaun ne’e Governu foti hafoin rona aprezentasaun hosi Sala Situasaun-Sentru Integradu Jestaun Krize (SS-CIGC) kona-ba pontu situasaun epidemiolójika iha Timor-Leste.

“Permite realizasaun selebrasaun koletiva relijioza no eventu koletivu kultu sira seluk, dezde ema sira iha serimónia mantein distánsia pelumenus metru ida ho ema seluk ne’ebé la hela hamutuk, no nafatin uza máskara oin ne’ebé taka to’o inus no ibun,” MInistru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha salaun Ministériu Finansa (MF), Aitarak-laran.

Maski nune’e, sei mantein nafatin impozisaun konfinamentu domisiliáriu jerál ba ema hotu iha munisípiu Dili, exetu ho razaun forte, liuliu tanba seguransa públika, serbisu no ba asesu sasán no servisu ba nesesidade bázika.

Tuir Portavóz Governu, informasaun ne’ebé Governu simu hosi Arsebispu Dili katak Dioseze Dili bainhira realiza hikas atividade relijioza sira, sei aumenta númeru misa atu nune’e kada misa sei iha sarani ho númeru ne’ebé reduzidu.

“Signifika númeru misa mak aumenta barak. Igreja hato’o mai Governu katak sei halo esforsu atu sarani sira bainhira tuir misa bele kumpre nafatin regra saúde no garante distansiamentu sosiál, fase liman ho sabaun. Hosi esforsu sira ne’e, Governu apresia informasaun no vontade tomak ne’ebé mak uma kreda hatudu,” governante ne’e subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here