Plenária Parlamentu Nasionál. Imajen Tatoli/António Gonçalves.

DILI, 31 maiu 2021 (TATOLI)—Parlamentu Nasionál (PN), segunda ne’e baixa ona proposta-lei alterasaun hamutuk tolu (3) inklui alterasaun ba lei eleitorál Prezidente Repúblika ba Komisaun A ne’ebé trata asuntu Justisa no Konstitusionál hodi halo apresiasaun inisiál.

Notísia Relevante: Alterasaun Lei Eleitorál Prezidente Repúblika garante kondisaun ba realizasaun votu

Proposta-lei ne’e, Prezidente Parlamentu Nasionál, Deputadu Aniceto Longuinhos Guterres Lopes, anúnsiu admisaun no baixa ba Komisaun A ne’ebé trata asuntu Justisa no Konstituisionál ho durasaun durante loron 15 atu halo apresiasaun inisiál.

“Ohin, meza admite no baixa ba Komisaun Justisa no Konstituisional kona-ba proposta-lei tolu ne’e, tanba ne’e meza prazu ba Komisaun A ho durasaun loron 15 atu halo apresiasaun inisiál. Dentru loron 15 pakote lei tenke submete mai plenária,” Aniceto Guterres anunsia liuhosi plenária Parlamentu Nasionál.

Proposta-lei alterasaun tolu (3) ne’e kompostu hosi alterasaun datoluk ba Lei númeru 5/2006, 28 dezembru kona-ba Órgaun Administrasaun Eleitorál, alterasaun dahuluk ba Lei númeru 6/2016, 25 maiu kona-ba Lei Resenseamentu Eleitorál no proposta-lei alterasaun daneen ba Lei 7/2006, 28 dezembru, kona-ba Lei Eleitorál ba Prezidente Repúblika.

Entretantu Prezidente Komisaun A, Deputadu Joaquim dos Santos ‘Boraluli’, hateten prazu ne’ebé plenária fó sufisiente.

“Komisaun A sei trata pakote lei ho urjénsia tanba importante, ne’ebé prazu loron 15 ne’e sufisiente,” nia informa.

Notísia Relevante: Alterasaun Lei Resensiamentu Eleitorál, aplika multa kuandu la kuidadu kartaun

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here