Atividade iha sala plenária Parlamentu Nasionál. Imajen TATOLI/António Gonçalves.

DILI, 31 maiu 2021 (TATOLI)—Parlamentu Nasionál (PN), segunda ne’e aprova proposta-lei divizaun administrativa territóriu ho unanimidade iha finál globál nune’e Loré, Hatulia B sai postu administrativu foun no Atauro sai munisípiu foun iha 01 janeiru 2022 maibé sei hein promulgasaun hosi Prezidente Repúblika.

Notísia Relevante: Materia foun proposta-lei DAT sei muda Divizaun Administrativa Munisípiu Dili

Votasaun finál globál ba proposta-lei númeru  29/V (3), ne’ebé husu altera  Lei númeru 11/2009, 7 outubru, kona-ba divizaun administrativa territóriu ne’e aprova ho votu a-favór 54, kontra 0 no abstensaun 0.

“Proposta-lei kona-ba divizaun administrativu territóriu aprovadu. Tanba aprovadu ona entaun meza sujere Governu no tékniku hosi parlamentu bele tuur hamutuk hodi haree kedas redasaun finál, nune’e aban dadeersan haruka kedas ba Prezidente Repúblika hodi hetan promulgasaun,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Alterasaun daruak ba Lei númeru 11/2009, 7 outubru, kona-ba divizaun administrativa territóriu ne’e ho objetivu atu aselera deskonsentrasaun administrativa no desentralizasaun administrativa.

Nune’e mós, alterasaun ne’e reafirma kompromisu polítiku hodi asesu ba serbisu públiku hosi populasaun lokál hodi hamosu partisipasaun atividade iha administrasaun públika, nune’e serbisu públiku presta ho efisiente no efikaz liu ho kualidade aas.

Proposta-lei Dizivaun Administrativu Territóriu, aprova hosi lei númeru 11/2009, 7 outubru, altera hosi lei númeru 4/2016, 25 maiu, ho rekizitu ba kriasaun, modifikasaun no estinsaun sirkunskriasaun administrativa, ekilíbriu potensiál no rekursu ba dezenvolvimentu no fó konsiderasaun ba fatór jeográfiku, demográfiku, ekonómiku, sosiál, kulturál no administrativa sira.

Nune’e mós interese orden nasionál no rejionál, ne’ebé espesifikamente kriasaun ba munisípiu sira, ezemplu Ataúro sai ona munisípiu.

Iha proposta-lei ne’e  previstu Atauro sai munisípiu foun, Hatulia B (Ermera) no Loré (Lautem) sai postu administrativu foun.

Bainhira diploma ne’e promulga, entaun hahú hosi 01 janeiru 2022, Ataúro sei sai ho munisípiu foun kompleta ho administrasaun públika.

Proposta-lei ne’e aprezenta hosi Ministériu Administrasaun Estatál (MAE).

Notísia Relevante: MAE-PM hahú diskute transforma Ataúru sai munisípiu espesiál

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here