Ministru Administrasaun Estatál, Miguel Pereira de Carvalho. Imajen TATOLI/Egas Cristovão

DILI, 09 fevereiru 2021 (TATOLI)–Ministru Administasaun Estatál (MAE), Miguel Pereira de Carvalho, hahú deskute ho Primeiru-Ministru (PM), Taur Matan Ruak, kona-ba preparativu ba transformasaun illa Ataúru sai munisípiu espesiál.

“Ami haree preparativu sira atubele garante katak Ataúru iha infraestrutura ne’ebé maka naton, nune’e aban bain-rua bele transforma sai munisípiu espesiál ida,” Ministru  Miguel Pereira informa hafoin hasoru malu ho PM Taur iha Palásiu Governu, tersa ne’e.

Notísia relevante: MAE aprezenta opsaun polítika-lejizlativa rua iha KM

Governante ne’e konsidera, atu estabelese munisípiu ida presiza tebes preparativu, liuliu ba infraestrutura bainhira iha ona poder lokál no fasilidade sufisiente.

“Kestaun ne’e deskute ona iha Konsellu Ministru, liuhosi opsaun polítika-lejislativa Ministériu Administrasaun Estatál hodi halo  aprezentasaun iha semana tolu ba  kotuk  no Konsellu Ministru apresia proposta ida ne’e, katak iha nesesidade harii munisípiu Ataúru,” nia akresenta.

Tanba ne’e, presiza proposta alterasaun husi Governu hodi lori ba Parlamentu Nasionál hodi diskute.

“Ita haree Konstituisaun preeve katak tenke iha tratamentu administivu espesiál ba fatin rua hanesan Oé-cusse no Ataúro. Tanba ne’e presiza hatúr forma legál atu trata asuntu sira ne’e,” nia hatutan.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here