Primeiru-Ministru, Taur Matan Ruak. Imajen TATOLI/Egas Cristóvão.

DILI, 27 maiu 2021 (TATOLI)—Primeiru-Ministru, Taur Matan Ruak, hateten ezekusaun Orsamentu Jerál Estadu (OJE) 2021 ba Todo Governo inklui kompromisu no obrigasaun atinje ona 25%.

Notísia Relevante: Ezekusaun OJE 2021 atinje 22%, projesaun sa’e iha trimestre datoluk

 “Ami to’o agora ne’e, ho kompromisu no obrigasaun sira-ne’e atinje ona 23%. Ha’u konsidera ida-ne’e ezekusaun ida sei kiik. Governu sei halo prepartiviu para ita bele to’o fim do ano ita aumenta nível ezekusaun. Bainhira Governu ba iha Parlamentu Nasional sempre ezije tanbasá mak nível ezekusaun fraku,” Primeiru-Ministru hateten ba jornalista sira hafoin halo enkontru ho Prezidente Republika, Francisco Guterres Lú Olo, iha Pálasiu Prezidensiál Nicolau Lobato, Bairru Pite, dili, kinta ne’e.

Nível ezekusaun fraku, Xefe Governu ne’e hateten tanba iha fatór barak ne’ebé difikulta setór estatál (Governu) nia atividade no atividade hotu-hotu mak pandemia COVID-19 ne’ebé halo rai ne’e sai kloot.

Fatór seluk mak Orsamentu Jerál estadu 2022 nian normalmente kada tinan ne’e fulan-maiu ne’e hahú halo ona diskusaun, maibé jornada OJE sei tarde uitoan iha jullu.

“Governu sei halo esforsu hotu para orsamentu jerál estadu 2022 ne’e tama iha Parlamentu Nasionál tenke tuir tempu no lei haruka,” Xefe Governu ne’e hateten.

Aleinde ne’e Primeiru-Ministru Taur Matan Ruak, informa kona-ba situasaun pandemia COVID-19 liuliu kona-ba serka sanitaria, konfinamentu obrigatóriu no situasaun vasina AstraZeneca iha Timor-Leste.

Notísia Relevante: COVID-19: kazu óbitu ida, pozitivu 213 no ativu 2.727

“COVID-19 ne’e ita ko’alia buat rua mak ita-nia komportamentu estadu emerjénsia, serka sanitária, konfinamentu obrigatóriu no ida seluk ita ko’alia kona-ba vasina. Ita haree ba oin tempu ba tempu númeru sa’e makaas, ema mate to’o horisehik 14. Ida-ne’e sira kontabiliza naran mai iha saúde no saúde fó sai, ita la hatene balun keta mate iha relasaun ho ida-ne’e,” nia dehan.

Atu redús kazu positivu ne’e, Xefe Governu husu ba populasaun sira atu kontinua nafatin kumpre regra no orientasaun hosi Organizasaun Mundiál Saúde (OMS) no Ministériu Saúde (MS) hodi avansa ho vasina.

“Agora, ita vasina liu ona 60.000. Pelumenus to’o fulan-maiu no fulan-juñu ne’e, tenke vasina 200.000,” Primeiru-Ministru hateten.

Taur Matan Ruak informa, iha tempu badak vasina sei mai 100.000-resin, konta hamutuk ho aban (sesta, 28/05) ida mai hosi Austrália 2.000 ne’e kuaze 120.000, entaun tenke avansa ho vasina makaas.

“Fulan-juñu mai, ha’u simu vasina doze daruak nian, pelumenus risku ne’e menus ona. Eentaun, tuir mai sira hotu ne’ebé simu kompletu, sira-ne’ebé mak seidauk simu, simu nafatin ba para redús ida mate, redús grave, no ospitalizasaun. Tanba ne’e mak ita tenke fó kontribuisaun,” nia dehan.

Kazu ajente polísia baku vendedór

Nakait ba kazu ajente polísia baku vendedór iha Tasi-Tolu foin lalais ne’e, Primeiru-Ministru lamenta maibé kazu ne’e iha prosesu disiplinár no investigasaun nia-laran, maibé husu ba sidadaun sira tau respeita nafatin ba Polísia Nasionál Timor-Leste (PNTL).

“Ha’u lamenta, ha’u mós fó orientasaun ba iha ha’u-nia Vise-Ministru Interiór hodi halo reuniaun ho komandu sira, prosesu disiplinar ne’e sei iha investigasaun no sei la’o para haree no apura. Maibé ha’u husu ba sidadaun sira para respeita ita-nia polisia sira. Labele tuda PNTL sira tanba ikus-ikus ne’e lasu de’it tuda PNTL no trata PNTL. Kuitadu, ita kuandu iha susar-laran, ita presiza sira. Kuandu ita di’ak, ita duni sira no trata sira, ne’e labele,” Taur Matan Ruak hateten.

Nasaun Timor-Leste bele ki’ik maibé importante mak povu ida tenke sivilizadu, ida-ne’e hanorin respeitu ne’ebé hahú hosi uma-laran no hahú hosi inan-aman no maun alin sira depois mak respeitu iha sosiedade nia-leet, tanba armónia no dame ne’e maihosi respeitu.

“Bainhira respeitu laiha, violénsia sei buras iha rai-laran,” Primeiru-Ministru hateten.

Tanba ne’e. Xefe Governu ne’e apela joven sira, inan-aman no polísia sira para kontinua mantein tanba durante tinan ida-nia laran, loron-kalan polísia sira iha de’it estrada hodi fó seguransa no la deskansa, maibé husu ba polísia sira atu violénsia labele akontese tan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here