Estudante-sira rejistu hodi halo teste swab iha CCD, tersa (25/05/21). Imajen Tatoli/António Gonçalves.

DILI, 27 maiu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu ida, pozitivu  213, rekoperadu 225 no ativu 2.727.

Kazu óbitu timoroan mane ho idade 59, hela iha Mascarenhas, postu administrativu Vera Cruz, munisípiu Dili, ohin dader tuku 3:00, ba Ospitál Nasionál Guido Valadares (HNGV sígla portugés) ho keixa isin-manas, muta, kabun laran moras durante loron rua iha uma. Matebian iha mós istória operasaun fatuk iha rins.

Notísia relevante:COVID-19: pozitivu 231, rekoperadu 158 no ativu 2.739

“Hafoin halo ezame fíziku no ezame komplementár sira-seluk, médiku-sira to’o iha diagnóstiku traballu ka working diagnosis peritonite no septic shock.

“Alende ne’e, deteta mós pozitivu SARS-CoV2 ho Cycle Threshold (CT) N2gene 40,8, Egene 38,8. Hosi HNGV transfere ba fatin izolamentu Vera Cruz, no iis-kotu iha 11:50 ho multiple organ failure,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liu hosi komunikadu, kinta ne’e.

Kazu foun 213 ne’ebé datetadu ohin, mai-hosi Dili 182 no munisípiu-sira iha 31, ne’ebé kompostu hosi mane 124 feto 89.

Hosi totál kazu detetadu foun ohin, ho idade 12 mai karaik iha na’in-ida, idade entre 12-59 na’in 204 (95,7%), idade 60 mai karaik iha na’in-sia ne’ebé proporsaun kazu sintomátiku hamutuk 9,3%.

Kumulativu kazu konfirmadu sura hosi 21 marsu 2020 to’o 27 maiu 2021 hamutuk 6.459. Hosi horisehik mai ohin, teste ne’ebé Laboratóriu Nasionál Saúde halo hamutuk 1.604 PCR, ho detallu hanesan tuir-mai, Vijilánsia sentinela 84, rastreiu ba kontaktu ka Contact tracing 188, Rastreiu Aleatóriu ka Random Screening 287, Viájen sai-hosi serka sanitária hosi Dili 729, Viájen internasionál 290, Follow up iha kuarentena 31.

Totál testes PCR ne’ebé halo horisehik 26 maiu iha munisipiu-sira seluk, RAEOA no HNGV hamutuk 691,  ho  detalla hanesan tuir-mai, Maubisse 160, Maliana 64, Viqueque 49, Suai 80, Baucau 113, Ermera 106, RAEOA rua no HNGV 117.

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 14,5/100 mil abitante, enkuantu ba de’it munisípiu Díli 47,8/100 mil abitante.

Lista tuir-mai hatudu valór nominál média (rata-rata) taxa insidénsia COVID-19 durante loron hitu ikus, pur munisípiu Aileu 1,8/100 mil, Lautém 0,0/100 mil, Ainaro 0,4/100 mil, Liquiça 0,4/100 mil, Baucau 2,7/100 mil, Manatuto 0,9/100 mil, Bobonaro 10,1/100 mil, Manufahi 0,0/100 mil, Covalima 4,7/ 100 mil, RAEOA 0,4/100 mil, DIli 47,8/100 mil,  Viqueque 2,3/100 mil,  Ermera 0,1/100 mil.  

Insidénsia iha leten, sei nafatin hatudu katak, munisípiu Dili mak fatin ho risku bo’ot liu atu populasaun hetan da’et no  hada’et tutan virus SARS-CoV-2, tuir kedan maka munisípiu Bobonaro ho Covalima, Baucau no Viqueque.

Informasaun hosi izolamentu

Iha 27 maiu 2021, izolamentu Vera Cruz halo tratamentu ba kazu detetadu na’in 41, iha área obstetrisia na’in 20 no iha medisina interna na’in 19, pediatria ida, neonatolojia ida,  iha obstetrisia na’in 20  kategoria leve ka mild hotu.

Iha área medisina interna na’in 19.  Na’in-haat  grave, rua iha ICU uza  CPAP  na’in-rua  uza oksijéniu, na’in-lima moderadu, 10 leve (mild) hotu. Kazu ida iha pediatria tama iha kategoria leve (mild).

Kazu ida iha neonatolojia, moris liu hosi partu normál iha fasilidade Izolamentu Vera Cruz, hosi inan pozitivu ho Cycle Threshold (CT) N2gene 24,9, Egene 24,0.

Hafoin  hala’o test PCR, bebé mós pizitivu ho Cycle Threshold (CT) N2gene 18,2, Egene 14,4. Foin primeira vez bebé ida moris iha Vera Cruz, hosi bebé 17 ne’ebé moris hosi inan pozitivu, hafoin test, bebé mós pozitivu. Kazu ne’e tama iha kategoria leve (mild).

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Apelu

Apela ba populasaun iha Timor-Leste laran tomak atu tu’ur hakmatek, kumpri ho rigór regra serka  sanitária no konfinamentu domisiliáriu ne’ebé Konsellu Ministru deside no implementa ona to’o ohin loron.

Husu atu hotu-hotu kolabora  ho autoridade saúde  hodi  bele buka-tuir  ema hotu ne’ebé hetan da’et  ona virus ne’e,no izola hosi no labele hada’et-tutan ba ema ne’ebé seidauk hetan da’et.

Ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras COVID-19 da’et ba mai.

Regra sira ne’e, mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here