Komisária Nasionál Komisaun Direitu Labarik, Dinorah Granadeiro. Imajen/TATOLI

DILI, 26 maiu 2021 (TATOLI)—Komisária Komisaun Nasionál Direitu Labarik, Dinorah Granadeiro, hatete iha tempu badak KNDL hamutuk ho Komisaun Nasionál Kontra Traballu Infantil sei entrega dadus labarik hamutuk 300 ba Ministériu Solidaridade Sosiál no Inkluzaun (MSSI) atu prosesa, nune’e labarik sira-ne’e bele hetan apoiu bolsa da mãe.

Notísia Relevante: Reuniaun KM: MSSI aprezenta proposta reforma programa Bolsa da Mãe

“Iha tempu badak ita hamutuk ho Komisaun Nasionál Kontra Traballu Infantil sei submete dadus labarik 300 ba MSSI nune’e sira bele prosesa no labarik sira bele hetan apoiu bolsa da mãe. Tanba liuhosi apoiu nune’e para labarik sira foka de’it ba sira-nia eskola no vida normál hanesan labarik nian,” Dinorah Granadeiro hateten ba Agência TATOLI, iha nia knaar fatin Caicoli, Dili, tersa ne’e.

Komisaun Nasionál Direitu Labarik (CNDL, sigla portugés) halibur ona dadus labarik kuaze 300 ne’ebé iha ona maibé KNDL sei halo short list, tanba la’ós hotu-hotu hetan apoiu no labarik balun ne’e sei entegra fila-fali ba sira-nia família.

“Ha’u labele dehan númeru ne’ebé mensiona iha leten maibé ami sei prosesu kompilasaun ba dadus ne’e. Maibé, ita iha serteza katak dadus sira-ne’e sei oferese ba MSSI atu haree mekanizmu hodi fó apoiu,” nia dehan.

Dadus ne’e, KNDL sei submete ba MSSI hafoin mak MSSI ho nia ekipa inklui xefe suku ho xefe aldeia sira hodi servisu hamutuk halo asesmentu para hatene labarik sira-ne’e merese duni atu hetan apoiu ne’e ka lae.

“Ami labele define katak labarik hanesan ne’e mak simu apoiu hosi MSSI, ne’e lae,” Komisária ne’e hateten.

KNDL ho Komisaun Nasionál Kontra Traballu Infantil (CNCTI, sigla postugés) halibur dadus ne’e tanba iha Timor-Leste labarik kuaze maihosi rendimentu mínimu hosi asesmentu ne’ebé halo ne’e hatudu katak labarik sira tenke apoiu família hodi hetan rendimentu, nune’e sustenta nesesidade família sira-nian ba loron-loron nian.

Komisária KNDL ne’e hateten, realidade ne’ebé nia haree no observa iha terrenu ka iha dalan ninin labarik barak mak faan sasán maibé dala barak la’ós família mak haruka, ema seluk mak uza sira hodi hakonu sira-nia nesesidade uma-laran nian, liuliu akontese ba labarik sira hosi Oé-Cusse.

“Tanbasá mak ha’u dehan nune’e. Tanba bainhira ha’u sai servisu atu ba uma hetan labarik faan iha dalan no ha’u rasik aproxima sira no husu ba sira sé mak haruka alin faan. Sira dehan ha’u mak harakak faan tanba faan osan barak. Labarik dehan ami faan la’ós ami-nia inan-aman mak haruka,” nia afirma.

Hosi resposta ne’e, nia dehan, labarik sira ne’ebé faan sasán iha dalan ninin sira-ne’e la’os faan tanba sira-nia hakarak no sira-nia inan-aman haruka maibé ema seluk mak utiliza sira hodi faan sasán no hakonu ema seluk nia nesesidade.

Nia dehan, hosi totál labarik 300 ne’e labarik maihosi Oé-Cusse mak barak liu (40%) maibé maiória mós eskola hela mak hodi faan sasán.

Hosi labarik sira ne’e, tuir nia, mesak labarik ho idade hosi 7-16 mak durante ne’e halo negósiu kiik-oan hodi ajuda família no balun haruka hosi ema balun.

Planu peñor labarik, KNDL konsidera aktu krime

Aleinde ne’e Dinorah Granadeiro hateten, inan ida-ne’ebé planu atu peñor labarik ba kost-na’in tanba osan laiha atu selu kost foin lalais ne’e, KNDL konsidera aktu ne’e krime  ne’ebé planu atu penor nia-oan ne’e tanba nesesidade família nian maibé atu (acto) ne’e krime tanba labarik ne’e la’ós sasán.

“La’ós atu peñor nia-oan, maibé foin planu atu peñor labarik ne’e. Ho ne’e, ha’u hanesan Komisária ba KNDL ne’e, ha’u triste tebes ho situasaun ida-ne’e tanba la merese atu peñor. Labarik ne’e la’ós sasán hodi sosa no faan atu hakonu ita-nia nesesidade família nian maibé labarik hanesan umana ida iha direitu fundamentu tomak iha Estadu Demokrátiku ida-ne’ebé mak garante kedas ho ita-nia konstituisaun RDTL,” Dinorah Granadeiro hateten.

Aktu ne’e konsidera trafiku umanu no krime no kontra direitu fundamental labarik nian, tanba iha Konstituisaun artigu 18 garantia direitu fundamentu sira katak asaun hanesan ne’e labele akontese ba labarik sira, tanba Timor-Leste mós ratifika konvensaun ba direitu labarik nian ne’ebé mak hakarak ka lakohi Estadu tenke kumpre no implementa.

Maibé, nia dehan, kazu refere iha hela prosesu investigasaun hosi Polísia Nasionál Timor-Leste (PNTL) entaun hein de’it ni iha parte balun ekipa unidade jéneru balun haklama ona uma-na’in atu hapara ezize sira.

Protesaun ba labarik sira-ne’e haktuir iha Konstituisaun RDTL artigu 18 (Protesaun Ba Labarik-oan Sira) ne’ebé hateten;

1.) Labarik sira iha direitu ba protesaun espesiál hosi família, komunidade, no mós estadu, liu-liu hasoru hahalok hotu hanesan la tau-matan, diskriminasaun, violénsia, opresaun, abuzu seksuál no explorasaun;

2.) Labarik sira hetan direitu hotu-hotu ne’ebé mundu rekoñese, hanesan direitu sira-ne’ebé hakerek ona iha konvensaun internasionál, ne’ebé estadu aprova no simu ona ka ratifika fila-fila;

3.) Labarik hotu-hotu ne’ebé moris iha kazamentu nia laran ka lae, iha direitu hanesan kona-ba protesaun sosiál.

Notísia Relevante: 2022, MSSI sei implementa programa foun ‘bolsa da mãe’

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here