Diretór Jerál, Ministériu Solidariedade Sosiál no Inkluzaun (MSSI), Rui Manuel Gago Exposto. Imajen Tatoli/Egas Cristóvão.

DILI, 25 maiu 2021 (TATOLI)—Ministériu Solidariedade Sosiál no Inkluzaun (MSSI), sei implementa planu foun ba programa ‘bolsa da mãe’, tanba konsidera programa ne’ebé oras ne’e iha, la kontribui hodi rezolve má nutrisaun iha Timor-Leste (TL).

“Kona-bá programa bolsa da mãe ne’ebé iha, la kontribui ba redusaun má nutrisaun, tanba valór orsamentu ne’ebé ita fó kiik tebes,’’ Diretór Jerál, MSSI, Rui Exposto, esplika iha reuniaun Komisaun Nasionál  Serbisu Tékniku ba Nutrisaun Timor Leste (KONSSANTIL) iha Palásiu Sinzas, Caicoli, tersa ne’e.

Notísia relevante:MSSI Sei Halo Reajustamentu Dadus Bolsa da Mãe

Tanba ne’e, MSSI iha ona planu foun nu’udár planu pilotu ba programa bolsa da mãe ne’ebé sei implementa uluk iha munisípiu tolu hanesan Bobonaro, Ainaro no Rejiaun Administrativa Espesiál Oecusse Ambeno (RAEOA), iha tinan 2022 to’o 2024.

Programa ne’e sei implementa uluk iha RAEOA tanba tuir dadus MSSI tinan 2015 hatudu katak, rejiaun ne’e mak númeru boot liu kona-bá má nutrisaun no ki’ak, tuir kedan munisípiu Bobonaro no Ainaro.

Bainhira programa pilotu ne’e sussesu, maka MSSI bele implementa ba munisípiu hotu-hotu no sei halakon tiha programa bolsa da mãe ne’ebé oras-ne’e iha.

Objetivu hosi programa ne’e, primeiru atu redúz má nutrisaun, segundu atu redúz pobreza iha TL, ne’ebé ho nia alvu ba inan isin-rua inklui bebé idade zero to’o loron 1.000.

Tuir planu, valór osan ne’ebé MSSI sei fó ba inan isin-rua hamutuk $15 kada fulan, bebé moris-mai $20, no bebé ne’ebé moris-mai ho kondisaun defisiente sei aumenta-tan $10 sai $30, tanba bebé defisiente nesesidade boot-liu kompara ho bebé ne’ebé moris-mai ho kondisaun normál.

Molok implementasaun, MSSI sei serbisu hamutuk ho Ministériu Saúde (MS) no Ministériu Administrasaun Estatál (MAE), atu bele haree sistema liga inan no mós programa KONSSANTIL.

Programa subsídiu bolsa da mãe ne’ebé agora daudaun iha, hahú implementa iha 2012 atu sustenta família vulnerável ho kada benefisiáriu, fulan ida simu $5 no tinan ida $60, maibé família ida labarik na’in-tolu mak rejista, entaun totál tinan ida $180.

Dadus hosi MSSI, oras ne’e daudaun benefisiáriu bolsa da mãe iha territóriu hamutuk 47.539.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here