Reuniaun Konsellu Ministru, iha Palásiu Governu. Imajen TATOLI/Egas Cristóvão

DILI, 24 fevereiru 2021 (TATOLI)–Vise Primeiru-Ministru no Ministra Solidariedade Sosiál no Inkluzaun (MSSI), Armanda Berta dos Santos no Vise-Ministra, Signi Chandrawati Verdial, halo aprezentasaun preliminár kona-ba proposta atu reforma programa Bolsa da Mãe liuhosi projetu pilotu ‘preparasaun ba jerasaun foun’ iha reuniaun Konsellu Ministru (KM).

“Reforma ne’e, prevee ona iha planu rekuperasaun ekonómika no hahú ho implementasaun faze-pilotu ida, ho durasaun tinan-tolu, ne’ebé foku ba infánsia dahuluk ho objetivu hodi hamenus ki’ak, má-nutrisaun no mortalidade infantíl,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu  iha Palásiu Governu, kuarta ne’e.

Portavós Governu ne’e dehan, diskusaun ne’e foin iha faze aprezentasaun opsaun polítika-lejizlativa ne’ebé iha tempu oin-mai MSSI sei hato’o hikas proposta ne’e ba Prezidénsia KM kona-ba dalan normativu saida mak sei opta.

Nune’e, bainhira nesesáriu atu altera dekretu-lei sira maka MSSI sei hato’o filafali ba Prezidénsia KM hosi halo avaliasaun no analiza didi’ak molok ezekutivu sira halo aprovasaun.

“Inisiativa ne’e hetan apresiasaun pozitiva hosi membru Konsellu Ministru, ne’ebé parte téknika maka presiza atu finaliza proposta refere no aserta didi’ak rekezitu legál sira ne’ebé tenke kumpre, nune’e bele implementa inisiativa alterasaun programa Bolsa da Mãe,” Ministru akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here