Vasina AstraZeneca, sesta (21/05/21). Imajen Tatoli/António Gonçalves.

DILI, 25 maiu 2021 (TATOLI)—Diretora Jerál Ministériu Saúde (MS), Odete Viegas da Silva, informa hosi fulan-abríl to’o mai fulan-maiu (2021) ne’e populasaun iha territóriu Timor-Leste ne’ebé simu ona vasina AstraZeneca kuaze 57.000.

Notísia Relevante: COVAX Facility oferese millaun $7 ba vasinasaun AstraZeneca iha TL

“Hosi fulan abríl to’o mai agora ne’e, iha territóriu Timor-Leste simu vasina kuaze 57.000. Ne’e faze dahuluk ne’ebé mak ita simu hosi COVAX facility iha 5 abríl no ita hahú halo lansamentu iha 7 abril ba primeira doze to’o iha 28 abríl, faze dahuluk ne’e ita fó vasina ba ema kuaze 28.668,” Odete Viegas da Silva hateten ba jornalista sira, bainhira ekipa ministériu saúde hala’o vasina ba Prezidente Repúblika no funsionáriu Prezidensia Repúblika, iha Palásiu Prezidénsia Nicolau Lobato, Bairru Pite, Dili, tersa ne’e.

Odete Maria da Silva hatutan, foin daudaun Timor-Leste hetan fali apoiu hosi Governu Austrália iha doze 40.000 no doze 20.000 ne’ebé halo ona vasina hosi 7 maiu to’o 20 maiu ne’e, alkansa ona ema 24.000 pesoa liu.

”Foin daudaun fali ita aumenta tan doze 20.000 hodi distribui iha 10 maiu no 24 maiu, ita konsege fó vasina ema iha Dili laran hamutuk 35.000-resin. Hosi doze 20.000 ne’e signifika 2.000 vial (frasku). Ita vasina ona hamutuk 960 vial no agora hela iha ita-nia liman ne’e, ita sei iha 1.158 vial. Ne’e signifika katak iha loron tolu-haat nia-laran, vasina sei ramata,” nia dehan.

Vasina ne’e sei fó prioridade liu ba ema ne’ebé moras no ema ne’ebé ho idade 60 ba leten, maibé ema seluk ne’ebé la tama iha krit’éria sira-ne’e mak entuziasmu hakarak hetan vasina ne’e ministériu saúde mós fó oportunidade.

Ba sidadaun balun ne’ebé la partisipa, nia hatán, Governu fó vasina ne’e voluntáriu no ema barak hakarak tuir vasina no ema balun lakohi partisipa másimu, maibé ba sira-ne’ebé la simu vasina ne’e mak sei transmite fali moras ne’e ba sira-ne’ebé hetan ka simu ona vasina ne’e.

“Tanba ida-ne’e, haa’u-nia hanaoin di’ak ida, ita la obriga maibé ita mós husu konsiénsia ba populasaun tomak atu partisipa. Ba sira-ne’ebé la partisipa ne’e sai ameasa boot ba ema sira-ne’ebé hetan tiha ona vasina,” nia dehan.

Se Governu konsege aselera vasina ne’e ho lalais no populasaun tomak iha Timor-Leste simu hotu vasina no to’o iha dezembru (2021) mak alkansa ona 80%, entaun signifika katak populasaun Timor-Leste bele book-aan livre ona.

Iha parte seluk, Diretora ne’e hateten sente onradu tanba Prezidente Repúblika Francisco Guterres Lú Olo disponível hodi hetan vasina AstraZeneca ba loron ohin (tersa, 25/05), hamutuk ho ekipa Gabinete Palásiu Prezidénsia, Bairru Pite. organiza malu no ekipa saúde fasilita halo vasina.

“Onra boot ba ami mak Prezidente Repúblika Francisco Guterres Lú Olo disponível hodi hetan vasina AstraZeneca ba ohin loron nian (25/05),” Odete Viegas hateten.

Tuir nia, vasina hanesan meiu ida hodi proteje aan, proteje família, ema ida-idak nia aan no komunidade sira-ne’ebé infensaun hosi moras COVID-19 ne’e, tanba hosi vasina ne’e mak oinsá bele proteje ema ne’ebé vulnerável liu no ba populasaun enjerál iha Timor-Leste.

“Tanba bainhira ita hetan vasina signifika ita bele redús númeru infesaun. Ita hetan vasina doze dahuluk mak ita sei hetan nia efikásia ne’ebé sei sa’e ba 74%. Ita sei hetan doze daruak nian depois de semana ualu. Se ita-boot sira simu vasina ohin mak sei konta semana ualu oin mai mak foin simu vasina,” nia dehan.

Bainhira ema ida mak simu tan vasina ba doze daruak nian mak signifika sistema unidade ka efikásia sei sa’e ba 82%, maibé lasignifika vasina ona ne’ebé virus la kona ona, sei nafatin maibé nia númeru infesaun ne’ebé transmite ba ema ne’e kiik ona.

“Se ha’u hetan vasina bele hetan vírus SARS-CoV-2 maibé atu tama gravida liu no tama ospitalidade ne’e, lae. Tanba vasina ne’e la’ós aimoruk maibé substánsia ida bele hatama ba ita-nia isin hodi fó protesaun ba ita. Nune’e husu ba funsionáriu hotu liuliu populasaun enjerál no ema hotu-hotu simu vasina mak sei livre hosi moras COVID-19 ne’e,” nia esplika.

Notísia Relevante: Austrália fornese vasina AstraZeneca doze 20.000 ba Timor-Leste

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here