Diretora Jerál Prestasaun Serbisu Saúde, Odete da Silva Viegas. Imajen Tatoli/Egas Cristovão

DILI, 09 fevereiru 2021 (TATOLI)—COVAX Facility liuhosi aprovasaun United Nations International Children’s Emergency Fund (UNICEF) oferese millaun $7 ba Governu Timor-Leste (TL) hodi fasilita vasinasaun AstraZeneca.

Koordenadora Jerál Komisaun Nasionál Prevensaun COVID-19, Odete da Silva Viegas, informa apoiu millaun $7 ne’e gratuita atu sosa ai-moruk ba vasinasaun AstraZeneca 20% no orsamentu 80% Governu Timor-Leste mak sei prevee.

Notísia Relevante:Governu sei sosializa vasinasaun AstraZeneca durante fulan rua

Tuir planu, orsamentu millaun $7 ne’e sei sosa ai-moruk ba vasinasaun ho kuantidade doses 100.000 ne’ebé to’o uluk TL iha fulan fevereiru-nia rohan, no faze daruak ho kuantidade dosis 160.000 sei to’o iha fulan abríl no maiu.

“Atu halo akizasaun ba vasinasaun AstraZeneca, COVAX facility apoia 20% ho orsamentu millaun $7 no hetan aprovizionamentu liuhosi UNICEF. Ita sei tau 80% ho orsamentu millaun $12-resin no ita tenki tau tan osan ba kustu operasionál millaun $1.2, tanba tuir planu orsamentu ba vasinasaun iha TL sei to’o millaun $21,’’ Koordenadora Jerál Komisaun Prevensaun COVID-19, Odete da Silva Viegas, ba jornalista sira iha Palásiu Sinzas, Caicoli, tersa (09/02).

Kona-bá orsamentu 80%, nia dehan, Governu TL mak sei finansia no proposta ikus aban sei aprezenta ba Konsellu Ministru (KM) hodi hein desizaun.

Odete mós rekoñese katak, Orsamentu Jerál Estadu (OJE) 2021 la prevee ba vasinasaun ne’e, maibé orsamentu fundu COVID-19 nian sei iha atu bele halo prosesu ida ne’e.

“Orsamentu iha fundu COVID -19 ne’e sei iha kuaze millaun $7, entaun bele ajuda prosesu sira ne’e,’’ nia subliña.

Entretantu, COVAX Facility nu’udár programa kunjunta mundiál ida atu fó apoiu ba asesu prevensaun COVID-19 liuhosi kolaborasaun peskiza, produsaun no asesu komun ba vasinasaun COVID-19.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here