Pesoál saúde fó vasina ba sidadaun iha sentru saúde iha Dili. Imajen TATOLI/António Gonçalves

DILI, 19 maiu 2021 (TATOLI)—Governu Austrália fornese tan vasina AstraZeneca ba Timor-Leste, nu’udar kompromisu ida atu suporta programa vasina nasionál atu kobre ba populasaun tomak.

“Ohin Austrália oferese tan AstraZeneca doze 20.000, ne’ebé antes ne’e oferese ona doze 20.000, entaun hamutuk doze 40.000, no ami sei kontinua oferese,” Embaixadór Austrália iha Timor-Leste, Peter Roberts, informa hafoin entrega vasina ba Governu Timor-Leste iha Aeroportu Comoro, kuarta ne’e.

Notísia relevante: Austrália apoia millaun $18.6 ba vasinasaun AstraZeneca iha TL

Pakote vasina ne’e transporta ho Aviaun Qantas hosi Darwin no to’o iha Aeroportu Internasionál Prezidente Nicolau lobato, Comoro, Dili meiu dia ne’e.

Diplomata ne’e dehan, nu’udar nasaun viziñu ne’ebé maka prodúz rasik vazina AstraZeneca, iha obrigasaun atu apoiu Timor-Leste.

“Ami rekoñese katak agora Timor-Leste  presiza vasina, tanba agora númeru infesaun aumenta ba bebeik, tanba ne’e Austrália fó prioridade atu fornese vasina,” nia akresenta.

Nia konsidera, vasina hanesan kilat atu luta kontra Coronavírus, tanba ne’e sidadaun sira tenke hetan hotu doze kompletu.

Ba kestaun vasina, Governu Austrália antes ne’e anunsia ona sei prevee millaun $18,9 hodi fasilita halo distribuisaun, edukasaun no monitorizasaun ba Timor-Leste.

Antes ne’e, Organizasaun Mundiál Saúde (OMS) liuhosi COVAX Facility, ne’ebé hetan aprovasaun hosi United Nations International Children’s Emergency Fund (UNICEF) oferese millaun $7 (reprezenta 20%) ba Governu hodi fasilita vasina AstraZeneca, enkuantu 80% hosi parte Timor-Leste rasik.

To’o loron 01 maiu, ema 28.678 iha territóriu tomak simu ona vasina AstraZeneca doze dahuluk, hosi vasina ne’ebé Timor-Leste simu iha faze dahuluk.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here