Octaviano Thal, negosiante nuu ne’ebé hetan agresaun fízika hosi membru PNTL, domingu (23/05). Imajen/foti hosi Facebook.

DILI, 24 maiu 2021 (TATOLI)- Vítima agresaun fíziku hosi Ajente Polísia na’in-rua iha pontu entrada Tasi-Tolu, Dili, 23 maiu liubá,  Octaviano Thal deklara katak, nia la lori nuu tuda ba Ajente Polísia iha akontesimentu ne’e, maibé Ajente Polísia-sira maka  soe nia nuu ba rai no na’in-ida tenta lori nuu tuda ba nia ulun.

Notísia Relevante : Membru PNTL baku Octavio Thal submete ba investigasaun

Ba jornalista-sira iha Sede FONGTIL, Caicoli, Dili, segunda ne’e, Octaviano Thal, hateten momentu akontese membru Polísia halo agresaun fíziku hasoru nia bainhira nia parte husu de’it katak sasán ne’ebé lori maske la tuir oráriu transferénsia sasán nian, maibé sasán to’o ona iha baliza ne’e halo transferénsia lalais bele fahe malu.

“Tanba de’it sira soe ha’u nia sasán, ha’u ko’alia hasoru sira dehan, ha’u komprende ohin la’ós loron transferénsia sasán, maibé ami iha ne’e ona pasa sasán lalais ami fila ona. Labele soe ha’u-nia sasán tanba ami osan laiha. Ida-ne’e mak sira baku no tebe ona ha’u. Informasaun ne’ebé dehan, ha’u tuda Ajente Polísia ho nuu ne’e laloos, maibé Ajente Polísia sira maka foti nuu atu tuda ha’u” Octaviano Thal haktuir.

Nia husu ba Ministériu Públiku tenke prosesu kazu ne’e ba oin, nune’e sidadaun hotu-hotu bele hetan nia direitu no hetan lia-loos.

Notísia Relevante : PDHJ husu komandu PNTL suspende membru baku sidadaun iha Tasi-tolu

Octaviano Thal marka prezensa iha Sede FONGTIL tanba konvida hosi FONGTIL rasik no FONGTIL mós ajuda fó advokasia ba Octaviano Thal hodi lori prosesu ne’e ba Ministériu Públiku no haruka relatoriu keixa ba mós instituisaun relevante-sira, hanesan Provedoria Direitu Umanu no Justisa (PDHJ), inklui mós haruka nota ba Komandu Jerál PNTL

FONGRTIL hosu PNTL respeitu direitu umanu

Logotipu FONGTIL

Liuhosi konferénsia imprensa iha Sede Forum Organizasaun Naun Governamentál Timor-Leste (FONGTIL), koordenadór advokasia FONGTIL, Ivo Colimau Lay Costa, husu Polísia Nasionál Timor-Leste (PNTL)  atu respeitu direitu umanu bainhira atende komunidade iha terrenu.

FONGTIL lamenta  atuasaun hosi membru PNTL ba negosiante fa’an nuu ne’ebé viral iha rede sosiál, 23 maiu 2021, iha pontu entrada Tasi-Tolu, Dili.

“Iha parte balu PNTL hahú iha mudansa hanesan kona-ba kazu droga, ita haree katak PNTL ativu tebes, ita labele dehan PNTL tomak la di’ak, ne’e lae, maibé iha terrenu kona-ba kazu viola direitu umanu ne’e menus loos tanba la hatudu profisionalizmu,” Ivo Colimau Lay Costa hateten.

Tuir loloos, Ivo Colimau hatutan, akontesimentu ne’e rezolve ho liafuan, la’ós halo fali ho aktu ne’ebé  bele konsidera dehan brutalismu, tanba ne’e mak kona-ba kazu direitu umanu nian, PNTL tenke hadi’a nune’e ba oin tenke servisu ho profisionalizmu.

FONGTIL husu PNTL tenke hadi’a kazu direitu umanu ho servisu profisionalizmu, razaun mak tanba sá tenke lansa agresaun fíziku ba vítima ne’e no  tuir loloos membru PNTL ne’e tenke profisionál hodi halo aproximasaun presausiva atu bele rezolve problema ne’e. Maibé realidade sira membru PNTL balun amostra sira-nia inkapasidade hodi asegura imajen di’ak instituisaun PNTL nian.

“Tuir deklarasaun hosi vítima katak sira membru Polísia  hakat ba vítima la ho komunikasaun ne’ebé saudavel tanba hasai liafuan la edukativu, maske vítima hasai liafuan ne’ebé edukativu hasoru sira, maibé sira la simu estraga vítima nia sasán hanesan nuu to’o halo agresaun fíziku ba vítima,” nia hateten.

FONGTIL konsidera informasaun ne’ebé PNTL lansa iha pájina Facebook Ofisiál PNTL nian hateten katak sira halo agresaun fíziku tanba vítima tuda sira ho nuu, maibé lójika ne’e sé sidadaun ida ka autór krime ida mak halo asaun krime ba autoridade kompetente hanesan polísia altura ne’e fasil tebes sira bele halo kapturasaun ka submete nia ba interrogatóriu.

“Realidade laiha tanba sira halo agresaun fíziku ba vítima liu oras ho balu ha’u rasik ho ekipa FONGTIL ho família vítima ami ba hasoru fila-fali polísia iha postu PNTL Tasi-Tolu, maibé realidade laiha asaun ida hosi vítima ba membru polísia,” Ivo Colimau Lay Costa haktuir.

FONTIL konsidera katak hahalok ajente polísia sira-ne’e frajil, tanba laiha evidénsia atu bele garante sira-nia hahalok.

“FONGTIL servisu hamutuk ho PRADET no instituisaun lubuk ida atu bele hahoris ona evidénsia no FONGTIL elabora ona submisaun no keixa, objetivu submisaun sira ne’e hodi manda ba iha Provedoria Direitu Umanu no Justisa (PDHJ) ho Ministériu Interiór, inklui Komandu PNTL rasik, PN Komisaun B ne’ebé trata asuntu seguransa no mós Krús Vermella Timor-Leste (CVTL sigla portugés) no Prokuradór Jerál Repúblika no keixa mak haruka ba Ministériu Públiku, atu prosesa kazu ida ne’e,” Ivo hateten.

Nia afirma, submisaun no keixa ne’ebé FONGTIL halo ne’e mós propoin atu aplika prizaun preventiva ba autór krime ajente Polísia na’in-rua ne’ebé halo agresaun fíziku ba vítima.

“Ami propoin atu halo prizaun preventiva tanba ne’e bazeia ba kódigu prosesu penál artigu 220, tanba ne’e Ministériu Públiku bele husu ba tribunál hodi hasai desizaun ida atu bele aplika prizaun preventiva ba autór krime refere,” Ivo Colimau afirma tan.

Razaun ajente polísia na’in rua ne’e tenke hetan prizaun preventive tanba tuir Ivo Colimau, sira nain rua nia aktu ne’e viola Konstituisaun RDTL iha artigu 30, no kódigu penál artigu 145, 146 ofensa integridade simples no mós ofensa integridade grave.

“Sira-nia aktu ne’e mós viola Lei orgánika PNTL artigu 4 ne’ebé mak ko’alia ba uza forsa ida ne’e ita aplika bainhira situasaun sira ne’ebé krusiál ka ameasa PNTL nia vida no viola regulamentu disiplinár PNTL iha artigu 11 kona-ba profisionalizmu ne’ebé instrumentu legál hirak ne’e sira viola hotu,” ,” nia argumenta.

Koordenadór Advokasia FONGTIL ne’e dehan, ho akontesimentu sira ne’e FONGTIL fó kulpa Komandante Jerál PNTL tanba ho razaun hahú iha fulan fevereiru to’o agora kazu violénsia direitu umanu barak liu mak komete hosi ajente ka membru PNTL.

“Ezemplu ita hotu hatene kazu ida iha Tasi-Tolu, 08 marsu  2021, ne’ebé involve membru BOP ida halo agresaun fíziku ba traballadór na’in rua Labelay, ida ne’e nia prosesu finál seidauk hatene, iha Taibesi ne’ebé segundu sarjentu ida baku traballadór hosi Munisípiu Dili nian, no iha kazu kuarentena Covalima no Manufahi entaun kazu sira ne’e sai ona sasukat ida ba FONGTIL atu bele haree kapasidade lideransa atuál PNTL atu bele garantia prinsípiu valór direitu umanu iha instituisaun PNTL,” Ivo Colimau hatutan.

Jornalista       : Arminda Fonseca

Editór             : Francisco Simões

1 KOMENTÁRIU

  1. karik aktus ida ne’e mak la aplika lei ba membru polisia sira ne’ebe mak submete ba krime ida ne, signifika katak, iha oknum balun mak ita bele dehan kebal hukum,,
    ohin sira sei baku, loron ruma sira sei tiru tan, tanba parte institusaun la foti medida hasoru nia membru ne’ebe mak kontra ona lei Direito Humanos…..
    Nasaun Ne’e sei sai furak karik parte hotu-hotu moris iha Lei nia okos, laos Lei ba povu kiik deit maibe ba parte balun lei sai la vale…..

HAKEREK NO HATÁN

Please enter your comment!
Please enter your name here