Komandante Operasaun Nasionál PNTL, Superintendente Xefe, Pedro Belo ho Portavóz PNTL, Superintendente Xefe, Arnaldo de Araújo. Imajen Tatoli/Eugénio Pereira.

DILI, 24 maiu 2021 (TATOLI)—Komandu Polísia Nasionál Timor-Leste (PNTL), loke ona prosesu investigasaun ba membru polísia na’in-rua ne’ebé halo agresaun fízika hasoru negosiante, Octavio Thal iha pontu entrada Tasi-tolu Dili, domingu (23/05) tuku 11:00 otl.

Komandante Operasaun Nasionál, Superintendente Xefe, Pedro Belo, konsidera asaun violénsia ne’e akontese tanba vítima viola regra, hodi ultrapasa fronteira hosi Dili ba área Liquiça.

Notísia relevante:PDHJ husu komandu PNTL suspende membru baku sidadaun iha Tasi-tolu

“Buat hotu sei liu hosi prosesu, hodi haree tuir lei dixiplinár PNTL no prosesu investigasaun la’o hela,” Pedro Belo hateten liu hosi konferénsia imprensa, iha Komandu Jerál PNTL, Caicoli, segunda ne’e.

Komandante Operasaun Nasionál ne’e rekoñese, katak, maski iha rezolusaun Governu la limita atividade negosiante roda tolu atu fa’an nú no sasán nesesidade iha loron no kalan, maibé iha rezolusaun Governu fó espasu ba negosiante-sira bele halo transasaun ba atividade negósiu iha pontu entrada, iha de’it segunda, kuarta no loron sesta.

Loron transaksaun atividade negósiu ne’e, PNTL implementa rezolusaun Governu númeru 60/2021 ne’ebé fó-sai klaru ba negosiante roda tolu bele hala’o de’it movimentu iha kapitál Dili no labele ba munisípiu-sira.

“Loloos ne’e polisia fó espasu ba negosiante atu bele hala’o atividade transaksaun iha pontu estrada, iha segunda, kuarta no sesta, maibé situasaun horisehik kontráriu, tanba atividade la’o fali iha domingu,” Pedro Belo hateten.

Bazeia ba relatóriu investigasaun ne’ebé PNTL simu, membru polísia-sira sosializa uluk ona regra ne’e ba negosiante hotu-hotu, maibé tanba negosiante ne’e ulun toos no lakohi kumpre, maka ikus-mai mosu dezentedimentu to’o agresaun fízika hodi hakanek mós membru polísia ida.

“Bainhira ita-nia negosiante-sira kumpre regra, ha’u hanoin asaun-sira ne’e la akontese, tanba negosiante ne’e viola regra hosi Dili ba Liquiça, atu lori fali sasán tama mai Dili laran,” nia argumenta.

Hafoin konfrontu, nia dehan, polísia mós hatún kedan negosiante ne’e ninia nú ba rai, tanba negosiante ne’e so’e nú ba rai kona kedan membru PNTL ida nia ulun to’o oin nakukun no sai mós vítima.

“Membru polísia ne’e tenta lori nú atu tuda ba negosiante ne’e, maibé la konsege, tanba membru ida seluk dada tun tiha ona negosiante ne’e hosi karossa leten,” Pedro Belo subliña.

Hatán kona-bá lamentasaun sosieidade sivíl ne’ebé konsidera asaun krime ne’e viola direitu umanu, Pedro Belo husu atu vítima no sosiedade sivíl-sira bele aprezenta keixa ba PNTL no Mistériu Públiku.

Komandu PNTL kontinua hein vitima Octavio Thal bele aprezenta keixa hodi rekolla mós deklarasaun hosi membru-sira atu bele prosesa kazu ne’e tuir natureza investigasaun.

Entretantu, Komandu PNTL Munisípiu Dili to’o agora hein hela vítima atu aprezenta keixa ba PNTL.

“To’o agora ami hein hela vítima seidauk mai atu aprezenta keixa,” nia informa.

PNTL mós prontu nafatin simu krítika no sujestaun hosi sosiedade hodi bele hadi’a profisionalizmu bainhira implementa lei respeita direitu sidadaun.

Entretantu, tuir deklarasaun hosi vítima Octavio Thal, katak, nia hetan baku hosi membru PNTL na’in-rua to’o oin no ulun bubu, bainhira atu ba foti nú hosi ninia maluk negosiante ida ne’ebé mai hosi Liquiça, iha área pontu entrada Tasi-tolu.

“Ha’u ba foti nú hosi kolega, fila mai hau tula nú ba tiga roda ne’e maka membru polísia mai ko’alia, so’e nú ba valeta laran no baku ha’u,” Octavio konta tuir.

Nia haktuir ho triste tanba atividade ne’ebé nia halo, hodi bele responde nesesidade família, liuliu hanesan responsável másimu ba nia inan faluk, alin sira no kaben ho oan.

Vítima rasik sei aprezenta keixa ba Forum Organizasaun Naun Govermentál (FONGTIL), PNTL no PDHJ.

Jornalista: Eugénio Pereira

Editór: Cipriano Colo

1 KOMENTÁRIU

  1. Karik ultrapasa…laos dalan uniku mak baku….
    Ita nudar umanu servi nasaun tenke ho fuan…laos servisu ho emosaun agresivu….

HAKEREK NO HATÁN

Please enter your comment!
Please enter your name here